जनकपुरधाम :परिवर्तनको आन्दोलनमा पटक–पटक जेलनेल परेका स्वतन्त्र सेनानी राजेश्वर नेपालीको निधन भएको छ । नेपाली पत्रकारिता क्षेत्रको जिउँदो इतिहासको रुपमा चिनिने स्वतन्त्रता सेनानी तथा वरिष्ठ पत्रकार राजेश्वर नेपालीको निधन भएको हो ।
जीवनको उत्तरार्धमा जेलनेल जीवनको क्रममा सेना र प्रहरीको यातनाको चोटले शरीर हिंडडुल र उठबसमा कष्टकर भएपछि थालिएका नेपालीको आइतबार साँझ ८:०५ मा निधन भएको हो । नेपालीको निजी निवास जनकपुरधाम उप–महानगरपालिका वडा नं २३ लादोबेला स्थित निधन भएको छोरा राघवेन्द्र साहले जानकारी दिए ।
पत्रकारिताको ‘इन्साइक्लोपिडिया’ उपनामले समेत विख्यात नेपालीको देहावसानले अपूरणीय क्षति भएको मधेश प्रदेशका सभामुख रामचन्द्र मण्डलले समाजिक सञ्जालमा श्रद्धाञ्जली प्रकट गर्दै भनेका छन् । उनले लेखेका छन, 'पत्रकारिता क्षेत्रको जिउँदो इतिहासको रुपमा चिनिने स्वतन्त्रता सेनानी तथा वरिष्ठ पत्रकार राजेश्वर नेपालीको निधनले नेपाली पत्रकारिता जगत र इतिहासको पानामा उहाँको अभाव सधै खडकिरहनेछ । जीवनको उत्तरार्धमा जेलनेल जीवनको क्रममा सेना र प्रहरीको यातनाको चोटले शरीर हिंडडुल र उठबसमा कष्टकर भएपछि थालिएका नेपालीको आइतबार साँझ ८:०५ बजे निधनको खबरले एक सच्चा पहरेदार गुमाएको छ ।’
समाचार लेखेकै कारण २०३६, २०३९ र २०४२ सालमा उनलाई तत्कालीन ब्यवस्थाले जेल हालेको थियो । २०३६ र २०३९ सालमा क्रमशः डेढ महिना जेल बसेका उनी २०४२ सालमा भने एक वर्ष जेल बसेका थिए । पत्रकारिता, साहित्य, सस्कृति र भाषाको क्षेत्रमा विशेष योगदान पुर्याउँदै आएका नेपालीले प्रजातान्त्रिक आन्दोलनमा महत्वपूर्ण योगदान पुर्याए वापत प्रजातान्त्रिक सेनानीको रुपमा २०६५ मा अभिनन्दन गरिएको थियो ।
राजनीतिबाट प्रभावित उनलाई २०१७ सालमा राजा महेन्द्रले ‘कु’ गरेपछि विघटन भएको संसदका सदस्य सरोजप्रसाद कोइरालाले प्रजातन्त्र पुनः स्थापनाका लागि हतियार बन्द आन्दोलनमा सहभागी बन्न खुबै जोड गरे । तर आफू गान्धिवादी दर्शनबाट प्रभावित भएको भन्दै हतियार उठाएर होइन, कलम चलाएर आन्दोलनमा सहभागी बन्छु भनेर जवाफ दिए अनि लागे सक्रिय पत्रकारितामा!
नेपाली, मैथिली र हिन्दी साहित्यमा कलम चलाउँदै आएका नेपाली आफ्नो लेखनमा प्रजातन्त्र, मानवता, शान्ति र राष्ट्रप्रेमलाई प्राथमिकतामा राख्थे । उनले समाजको लागि परिवर्तनकारी सोच, सामाजिक रुपान्तरणको लागि कलम निरन्तर चलाउँदै आएका उनी सरल स्वभावका आदर्शमुखी थिए । उनी गान्धी विचारबाट प्रभावित भएर पोशाक पनि गान्धी कै जस्तो खादी र सुती लगाउथे ।
मैथिली साहित्यमा एमए गरेका नेपालीका २ छोरा ३ छोरी थिए तर पत्रकारितामै लागेका जेठो छोरा रविन्द्र साहको २९ वर्षकै अल्पआयुमा निधन भयो । जेठो छोरा रविन्द्रले प्रकाशन सुरु गरेको विश्व जागरण दैनिक हालसम्म पनि राजेश्वर नेपालीको संरक्षकणमा प्रकाशन भइरहेकै थियो।
यो पनि पढ्नुहोस
प्रतिक्रिया दिनुहोस !
