अर्घाखाँची : कोरोना महामारीका कारण विगत चार वर्षदेखि रोकिएको अन्तरपालिका पुरुष भलिबल प्रतियोगिता सुचारु हुने भएको छ ।
अर्घाखाँची युवा परिषदको आयोजनामा हुँदै आएको जिल्लाको बहुप्रतिष्ठित भलिभल खेल २०७६ को संस्करणपछि हुन सकेको थिएन । अवस्था सहज हुँदै गएपछि यस वर्षबाट खेलका संस्करण पुनः सुचारु हुने परिषदका अध्यक्ष काजी श्रेष्ठले बताए ।
परिषद्ले अर्घाखाँचीका ६ वटा स्थानीय तहबीच पालिकास्तरीय चौथो अन्तरपालिका भलिबल प्रतियोगिता आउँदो कार्तिक १६ गतेदेखि सञ्चालन हुने पत्रकार सम्मेलनको आयोजना गरेर जानकारी दिएको छ ।
प्रतियोगितामा जिल्लाका ३ नगरपालिका र ३ गाउँपालिकाका टिमको सहभागिता रहने छ। खेललाई थप रोचक बनाउन प्रत्येक टिमले २ जना खेलाडी सम्बन्धित पालिकाभन्दा बाहिरबाट राख्न पाइने व्यवस्था गरिएको परिषदका महासचिव प्रकाश भुसालले बताए ।
खेल क्षेत्रको विकासमा टेवा पुगोस् भनेर प्रतियोगिता आयोजना गरिएको परिषदले जनाएको छ । भलिबल प्रतियोगितामा प्रथम हुने टिमलाई नगद ५० हजार पुरस्कार दिइनेछ। द्वितीय हुने टिमलाई नगद ३० हजार र तृतीय हुने टिमलाई २० हजार नगद पुरस्कार दिइनेछ।
यस्तै रनिङ्गशिल पचाउने टिमलाई ५० हजार थप गरी १ लाख पुरस्कार प्रदान गरिने महासचिव प्रकाश भुसालले जानकारी दिए । अहिलेको चौथो संस्करणमा शितगंगा नगरपालिकालाई शिल्ड पचाउने अवसर छ । २०७५ र २०७६ को संस्करण शितगंगाले जितेको थियो । अहिलेको संस्करण जितेर शिल्ड पचाउने अवसर शितगंगालाई रहेको छ । साथै प्रतियोगितामा उत्कृष्ट खेलाडीहरुले नगद पुरस्कार पाउनेछन्।
सामाजिक क्षेत्रमा सक्रिय परिषदले भजन कृतन, होली, रोपाइँजात्रा, माघे सक्रान्ति मेलामा कार्यक्रम गर्दै आएको छ । मनोरञ्जनका क्षेत्रका अलावा वृद्धाअश्रमलाई सहयोग, रक्तदान, स्वास्थ्य शिविर, विभिन्न रोजगार तथा शिपमुलक तालिमसमेत गर्दै आएको छ । परिषदले अन्य क्षेत्रमा पनि रचनात्मक कार्य गर्दै आएको छ ।
प्रतिक्रिया दिनुहोस !
