तानसेन : आज दसैंको पहिलो दिन पाल्पाका विभिन्न शक्तिपिठ तथा देवी भगवतीका मन्दिरमा भक्तजनहरूको भीडभाड बढेको छ । भक्तजनहरु बिहानै नदी तलाउँ,धारा कुवामा स्नान गरी चोखो वस्त्र पहिरिएर पूजा पाठ,तथा दर्शनका लागि भगवती दुर्गाका मन्दिर पुगेका छन् ।
जिल्लाको डाँडा टाकुरामा रहेका भगवती दुर्गाका मन्दिर सरसफाइ गरी आज नवरात्रदेखि देवीको नित्य पूजाआजा सुरु गरिएको हो । पाल्पामा अधिकांश देवी,भगवती,दुर्गाका मन्दिर,डाँडाको टुप्पोमा निर्माण गरिएका छन् ।
नवदुर्गा सुरू भएपछि भगवती मन्दिरका वरिपरी भक्तजन भजन कृर्तन,दुर्गा तथा चण्डी पाठ गर्दै देवीको आराधनामा गर्न भक्तजन जुटेका हुन् । तानसेनको भगवती मन्दिरमा परम्परागत नेवारी भाषाको डाफा भजन सुरु गरेको छ ।
लोपन्मुख अवस्थामा पुगेको नेवारी डाफा भजनलाई संरक्षणको वृद्धादेखि युवाहरूको सहभागी रहेको छ । परम्परागत भजन संस्कृतिमा बुढापाका मात्र सहभागी भइररहेको अवस्थामा युवाहरुलाई समेत डाफा भजन स्तुतिमा सहभागी गराएर तानसेनको पुरानो भजन संस्कृतिको जर्गेनाका लागि सहयोग पुगेको संस्कृतिकर्मी राजेन्द्र गोपाल सिंहले बताए ।
तानसेनको भगवती मन्दिर,रम्भापानीको रम्भा देवी मन्दिर,भुवनपोखरीको रैनादेवी मन्दिर,बतासेको कालिका मन्दिरलगायतका मन्दिरमा पूजाआजाका लागि भक्तजनको अध्याधिक भीड हुने गर्दछ । पाल्पामा नवदुर्गाको समयमा मन्दिर वरिपरी विभिन्न समूहबाट साहूहिक देवी स्तुति भजन किर्तन गर्ने परम्परा हालसम्म कायम रहेको पाइन्छ ।
आजै नवदुर्गाको पहिलो दिन घरघरमा घटस्थापना गरी देवीको पूजापाठ गरिएको छ।
प्रतिक्रिया दिनुहोस !
