महोत्तरी : महोत्तरी प्रहरीको सम्पर्कमा आएका पाँच जना किशोरीलाई अभिभावकको जिम्मा लगाइएको छ। बिहीबार इलाका प्रहरी कार्यालय गौशालाले अभिभावकलाई बोलाएर जिम्मा लगाएको हो।
औरही नगरपालिका-२ का १६ वर्षीया बसन्ती सदा, १६ वर्षीया प्रतिमा सदा, १८ वर्षीया संगीता सदा, १५ वर्षीया राजन सदा, २० वर्षीया रुबी सदा मंगलबारदेखि सम्पर्कविहीन भएका थिए।
प्रहरीले किशोरीलाई सम्झाई बुझाई अभिभावकको जिम्मा लगाइएको प्रहरी निरीक्षक मनोजकुमार यादवले जानकारी दिए। अधिकारकर्मी तथा सञ्चारकर्मीहरूको समन्वयमा उनीहरूलाई अभिभावकको जिम्मा लगाइएको यादवले बताए।
ती किशोरीहरू घरबाट अर्केस्ट्रामा काम गर्ने भनी घरमा कसैलाई जानकारी नदिइ सिरहाको मिर्चैया पुगेका थिए। उनीहरूले मोबाइलमा टिकटकबाट आर्केस्ट्राको पोस्टर हेरेर त्यहाँबाट नम्बर लिइ फोन गरेर ढल्केवर पुगेका थिए।
उनीहरूलाई आर्केस्ट्राका व्यक्तिले ढल्केवरबाट सिरहाको मिर्चैया लगेका थिए। त्यहाँ पुगेर काम नगर्ने भन्न थालेपछि अर्केस्ट्राको व्यक्तिले पुनः उनीहरूलाई मिर्चैयाबाट घर फिर्ता पठाइदिएका थिए। सोही क्रममा उनीहरू ढल्केवर पुग्दा प्रहरीले नियन्त्रणमा लिएर इलाका प्रहरी कार्यालय गौशालालाई जिम्मा लगाएको थियो।
यसअघि पनि महोत्तरीको भंगहाबाट यस्तै उमेर समूहका किशोरीहरू अभिभावकलाई जानकारी नगराइकन आरर्केष्टमा काम गर्नका लागि भारततर्फ जान खोज्दा प्रहरीले अभिभावकको जिम्मा लगाएको थियो।
प्रतिक्रिया दिनुहोस !
