प्रधानमन्त्री दाहाल दुबई प्रस्थान
काठमाडौं : प्रधानमन्त्री पुष्पकमल दाहाल दुबई प्रस्थान गरेका छन्। जलवायु परिवर्तनसम्बन्धी सम्मेलन (कोप-२८) सहभागी हुन उनी ९:३० बजे नेपाल एयरलाइन्सको विमानबाट दुबई प्रस्थान गरेका हुन्।
कोप-२८ भोलि (बिहीबार)देखि मंसिर २६ गतेसम्म सञ्चालन हुँदैछ। प्रधानमन्त्री दाहालले शुक्रबार र शनिबार हुने सत्रमा सहभागी हुने परराष्ट्र मन्त्रालयले जानकारी दिएको छ। प्रधानमन्त्री दाहालले शनिबार नेपालको तर्फबाट वक्तव्य दिनेछन्। पर्वतीय एजेन्डालाई प्रवर्द्धन गर्न प्रधानमन्त्री दाहालले ‘हिमालको आह्वान : जलवायु संकटबाट हामीलाई कसले बचाउँछ?’शीर्षकको उच्चस्तरीय कार्यक्रम आयोजना गर्ने परराष्ट्र मन्त्रालयले जनाएको छ।
त्यस्तै प्रधानमन्त्री दाहालले संयुक्त अरब इमिरेट्सको ५२औं संघट्ठय दिवस समारोह र ‘जायेद सस्टेनेबिलिटी प्राइज अवार्ड’समारोहमा पनि सहभागी हुने कार्यक्रम छ।
प्रधानमन्त्री दाहालले उच्चस्तरीय सत्रको अवसरमा सम्मेलनमा सहभागी विभिन्न मुलुकका राष्ट्र प्रमुख/सरकार प्रमुखका साथै अन्य उच्च पदस्थ व्यक्तित्वसँग द्विपक्षीय भेटवार्ता गर्ने तालिका रहेको मन्त्रालयले जनाएको छ। उनले अबुधाबीस्थित नेपाली राजदूतावासको भ्रमणका साथै नेपाली समुदायसँग अन्तरक्रिया र नेपाल-युएई व्यापार शिखर सम्मेलनलाई सम्बोधन गर्ने कार्यक्रम छ। प्रधानमन्त्री दाहाल भ्रमण सकेर आइबार स्वदेश फर्किनेछन्।