बागलुङ : बागलुङको एक विद्यालयका विद्यार्थीलाई न्यानो कपडा तथा स्टेशनरी सहयोग गरिएको छ । सामाजिक कार्यमा सक्रिय रोट्रयाक्ट क्लब अफ बागलुङले बागलुङ नगरपालिका–९ तित्याङको सिगाना माध्यमिक विद्यालयमा अध्ययनरत विद्यार्थीलाई न्यानो कपडा तथा स्टेशनरी सामग्री सहयोग गरेको हो ।
क्लबले ‘जाडोमा न्यानो कार्यक्रम’ मार्फत विद्यालयमा अध्ययतरत ३१ जना विद्यार्थीलाई ट्रयाक सेट, टिसर्ट, जुत्ता, मोजा र स्टेशनरीहरु सहयोग गरेको क्लबकी सचिव तारा केसीले बताइन् । उनले ६० हजार रुपैयाँ बराबरको सामानहरु सहयोग गरिएको बताइन् ।
‘६० हजार रुपैयाँ बराबरको ट्रयाक सेट, जुत्ता, मोजा र स्टेनशरीहरु सहयोग गरेका छौं,’ उनले भनिन्,‘देश विदेशमा रहेर क्लबलाई माया गर्ने व्यक्तिहरुको सहयोगमा न्यानो कपडा वितरण गरिएको हो ।’ सहयोगको लागि क्लबका कोषाध्यक्ष किशोर सापकोटाले ७ हजार रुपैयाँ खर्चमा स्टेशनरी सामाग्री सहयोग गरेका थिए ।
क्लबकी अध्यक्ष सुस्मिता केसीले जाडो मौसममा विद्यार्थीको सहजताका लागि न्यानो कपडा वितरण गरिएको बताइन् । उनले क्लबका पदाधिकारी तथा पूर्वसदस्यहरुको सहयोगले विद्यार्थीको मुहारमा खुसी बाँडन पाएको बताइन् ।
रोटरी क्लब अफ बागलुङका अध्यक्ष दिपेन्द्रबहादुर घिमिरेले क्लबले समाज रुपान्तरण र परिवर्तनका लागि विभिन्न खालका कार्यक्रम गर्दै आएको बताए। विद्यालयका प्रधानाध्यापक लक्ष्मण खड्काले क्लबले प्रशंसनीय काम भएको बताए।
प्रतिक्रिया दिनुहोस !
