धनकुटा : छथरजोरपाटी गाउँपालिका -१ कागुनेकी मनमाया लिम्बू शारीरिकरुपमा अशक्त छिन् । बोल्न सक्दिनन् । उनको घुँडादेखि भाग चल्दैन । दिसा -पिसाब गरेको थाहा पाउँदिनन् । शारीरिक अवस्था कमजोर भएका कारण अडेस लगाएर बस्न समेत सक्दिनन् । उनलाई भदा पदमबहादुर लिम्बूले पालन- पोषण गरिरहेका छन् । ज्यालादारीका रुपमा विद्यालयमा कार्यरत पदमबहादुर घरभन्दा बाहिर बस्छन्।
शारीरिक अशक्त भएकै कारण उमेरले ७ दशक पार गरिसकेकी मनमायाले नागरिकताबाट बञ्चित थिइन्। नागरिकता नबनेकै कारण सामाजिक सुरक्षा भत्ता र स्वास्थ्य विमाको सुविधा पाउन सकेकी थिइन्।
मनमायाले बल्ला ७३ वर्षको उमेरमा नागरिकता पाएकी छन् । वडाध्यक्ष गोविन्द लिम्बू,वडा सचिव चन्द्रप्रकाश सुवेदी र भदैनी बुहारीले उनलाई एम्बुलेन्समा राखेर जिल्ला प्रशासन कार्यालय धनकुटा ल्याएका थिए ।
मनमायाले कागजपत्रमा ल्याप्चे समेत लगाउन सकेकी थिइनन् । भदैनी बुहारी पवित्रा लिम्बूले उनको हात समाएर ल्याप्चे लगाइदिएकी थिइन् ।
तेस्रो प्रयासमा मनमायाले नागरिकता पाउँदा खुसी लागेको वडाध्यक्ष गोविन्द लिम्बूले बताए । नागरिकताका लागि तीनपटक जिल्ला प्रशासन कार्यालय धाउनु परेको उनले दु:खेसो पोखे। 'मनमायाको अवस्थाबारे सीडीओ कार्यालयमा जानकारी गराउँदा केही कागजपत्रमा समस्या भयो । कर्मचारी समयतालिका नमिल्दा घरमै लगेर नागरिकता दिन सकेनन । त्यही भएर बाध्य भएर एम्बुलेन्समा ल्याउनु परेको हो,'उनले भने।
उनका अनुसार गत मंसिर ८ गते बसेको वडा समितिको बैठकले नागरिकताविहीनलाई नागरिक दिलाउन सर्भे गर्ने निर्णय गरेको थियो । सर्भेका क्रममा मनमायाले नागरिकता नपाएको खुलेको हो।उनको अवस्था नाजुक थियो। वडा कार्यालयसम्म ल्याउन पनि समस्या थियो । वडा सचिव सुवेदीले उनको घरमै पुगेर सबै कागजपत्र बनाइ दिएका थिए।
एम्बुलेन्सको खर्च वडा कार्यालयले व्यहोरेको छ । सोही एम्बुलेन्समा वडाध्यक्षसहितको टोली आएको थियो । नागरिकता बनेपछि मनमायालाई घरैसम्म एम्बुलेन्सबाट पुर्याउने प्रबन्ध गरिएको वडा सचिव सुवेदीले बताए । उनका अनुसार पटकपटक टोली जाँदा पनि उनको शारीरिक र आर्थिक अवस्था कमजोर भएका कारण नागरिकता बन्न सकेको थिएन । यता प्रमुख जिल्ला अधिकारी पुण्यविक्रम पौडेलले वडा कार्यालयबाट आएको सर्जिमिन मुचुल्का र सिफारिसमा भएका विवरणमा केही फरक देखिएकाले ढिलाइ भएको बताए ।
प्रतिक्रिया दिनुहोस !
