गुलरिया : बर्दिया जिल्ला स्तरीय बुद्धिचाल प्रतियोगिताको च्याम्पियन गुलरियाका खिमबहादुर पुन मगर बनेका छन्। विभिन्न श्रेणीमा गराइएको खुला प्रतिस्पर्धामा मगरले उपाधि जितेका हुन्।
बढैयाताल गाउँपालिका सितलाबजारका ईश्वर श्रेष्ठ उपविजेता बन्दा भूरिगाउँका लोकराज पौडेलले तृतीय स्थान प्राप्त गरेका छन्। भेट्रान जेष्ठ नागरिक तर्फ गुलरिया वडा नम्बर ६ निवासी दिपक ढुंगाना विजेता बनेका छन्। मधुवनका कुवेर गुरुङ भेट्रान जेष्ठ नागरिक तर्फ उपविजेता बने। छात्रातर्फ गुलरियाकी रेखा राना प्रथम र गुलरियाकै अञ्जना थापामगर द्वितीय भए।
त्यस्तै छात्रतर्फ गुलरियाका दिनेश पुनमगर पहिलो र बढैयातालका अंकित घिमिरे दोस्रो स्थान हासिल गरेको आयोजक जिल्ला बुद्धिचाल संघ बर्दियाका सल्लाहकार दिपक अधिकारीले बताए। विजेता उपविजेता १७ जनालाई विभिन्न श्रेणीमा पुरस्कार तथा प्रमाण पत्र प्रदान गरिएको छ।
अंक भारका आधारमा ६ पटक गराइएको स्पर्धामा बढी जित्ने खेलाडीलाई जितका आधारमा विजेता उपविजेता घोषणा गरिएको उनको भनाई छ। गुलरिया नगरपालिका-६ को आर्थिक सहयोगमा बर्दियाको गुलरियामा आयोजित २ दिने प्रतिस्पर्धामा जिल्लाभरीबाट ५० जना खेलाडी सहभागी भएका थिए।
प्रतिक्रिया दिनुहोस !
