डडेल्धुरा : अविरल वर्षाका कारण विपद्मा परेका परिवारलाई राहत वितरण गरिएको छ । जिल्ला विपद् व्यवस्थापन समिति डडेल्धुराले गन्यापधुरा गाउँपालिकाका पहिरो प्रभावित तीन परिवारलाई राहत वितरण गरेको हो ।
साउन ३२ गतेको अविरल वर्षासँगै आएको पहिरोले प्रभावित भएका गन्यापधुरा गाउँपालिका –२ की मुन्नीदेवी भण्डारीलाई १५ हजार तथा भदौ २८ गते पहिरोले घर क्षति भएका गन्यापधुरा –२ का इश्वरीदेवी पाल र देबबहादुर देउवालाई २०/२० हजार राहतस्वरूप उपलब्ध गरेको समितिका संयोजक तथा प्रमुख जिल्ला अधिकारी चोमेन्द्र न्यौपानेले बताए ।
यस्तै,बहुउद्देश्यीय विकास समाज (एमपिडिएस) डडेल्धुराले पनि प्रभावित भएका परिवारलाई सहयोग गरेको छ । उसले प्रतिपरिवार २५ किलो चामल, दुई लिटर तेल, चार किलो दाल, दुई किलो चिनी र १ किलो नुन सहयोग गरेको जिल्ला प्रशासन कार्यालय डडेल्धुराले जनाएको छ ।
गन्यापधुरा गाउँपालिका–२ का वडा अध्यक्ष मनोजबहादुर देउवाका अनुसार तीनैजनाको घर पूर्ण क्षति भएको थियो भने राहतका लागि वडा कार्यालयले सिफारिस गरेको थियो । चाडपर्वको बेला प्रभावितलाई मिलेको राहतले उनीहरूलाई ठूलो सहयोग मिलेको वडा अध्यक्ष देउवाले बताए ।
प्रतिक्रिया दिनुहोस !
