क्यालिफोर्निया : अमेरिकामा आगालागीमा परेर हालसम्म ११ जनाको मृत्यु भएको लस एन्जलस काउन्टीको मेडिकल एक्जामिनरले पुष्टि गरेका बीबीसी समाचारमा उल्लेख छ।
शुक्रबार दिउँसो (अमेरिकी समय) जारी गरिएको अपडेटमा, चिकित्सा परीक्षकले पालिसेड्स आगलागीमा पाँच जनाको मृत्यु भएको र अन्य छ जना इटन आगलागीमा मृत्यु भएको बताएका छन्।
मृतकमध्ये अहिलेसम्म तीन जनाको मात्र पहिचान भएको छ।
लस एन्जलसका पाँच क्षेत्रमा फैलिएको आगो नियन्त्रण गर्न अग्निनियन्त्रकहरू अथक प्रयास गरिरहेका छन्।
पालिसेड्समा आगोले अन्यत्रभन्दा विकराल रुप लिएको छ। यहाँको २० हजार एकडभन्दा बढी जमिन आगलागीबाट प्रभावित भएको छ। अहिलेसम्म जम्मा आठ प्रतिशत आगो नियन्त्रणमा आइसकेको छ।
इटनमा लागेको आगलागीका कारण करिब १४ हजार एकड क्षेत्रफल जलेर खरानी भएको छ। यहाँ तीन प्रतिशत आगो नियन्त्रणमा आएको जनाइएको छ।
लिडियामा लागेको आगो ७५ प्रतिशत नियन्त्रणमा आइसकेको छ। यहाँ आगलागीबाट करिब ४०० एकड जमिन प्रभावित भएको छ।
हर्स्टमा ७७१ एकड जमिन जलेको छ र आगो ३७ प्रतिशत नियन्त्रणमा आइसकेको छ।
यसैबीच केनेथमा एक हजार एकडभन्दा बढी क्षेत्रमा फैलिएको आगो फैलिनबाट रोकिएको छ। अहिलेसम्म ३५ प्रतिशत आगो नियन्त्रणमा आइसकेको बीबीसीमा जनाइएको छ।
प्रतिक्रिया दिनुहोस !
