मोरङमा हात्तीको आक्रमणबाट एक महिनामा तीनजनाको मृत्यु

विराटनगर : मोरङमा पछिल्लो समय मानव–हात्ती द्वन्द्व बढेको छ । जंगली हात्तीको आक्रमणबाट सुन्दरहरैँचामा मात्रै एक महिनाको अवधिमा तीनजनाको मृत्यु भइसकेको छ ।
स्थानीयले बढ्दो हात्ती आतंक नियन्त्रण गर्न सरकारसँग माग गरेका छन् । हात्तीले जंगल छेउका बस्तीमा प्रवेश गरेर मानिसलाई आक्रमण गर्ने,घरहरू भत्काइदिने र बालीनाली खाने तथा नष्ट गर्ने गरिरहेको प्रहरीले जनाएको छ । हात्तीले जंगलसँग जोडिएका बस्तीमा बढी दुःख दिइरहेको हो ।
सुन्दरहरैँचा नगरपालिका–५, ७ र ८ नम्बर वडामा हात्तीको आक्रमणबाट एक महिनाको अवधिमा तीनजनाले ज्यान गुमाइसकेका छन् । मोरङ प्रहरीका प्रवक्ता डीएसपी वेदप्रकाश जोशीका अनुसार हात्तीले आक्रमण गर्दा शनिबार बिहानको राति सुन्दरहरैँचा– ८ का ७१ वर्षीय हरिप्रसाद घिमिरेको मृत्यु भयो । बच्चा (छावा)सहित आएको हात्तीले आक्रमण गर्दा घिमिरेको घटनास्थलमै मृत्यु भएको जोशीले बताए ।
हात्तीकै आक्रमणबाट गत पुस १७ गते सुन्दरहरैँचा–५ की चन्द्रकुमारी लिम्बू र पुस ५ गते सुन्दरहरैँचा– ७ की गंगा श्रेष्ठको मृत्यु भयो । जंगलबाट दाउरा लिएर आउँदै गर्दा सुन्दरहरैँचा–५ गुरुङ टोलकी ६१ वर्षीया लिम्बूलाई हात्तीले आक्रमण गरेको थियो । सुन्दरहरैँचा–७ स्थित सृजना सामुदायिक वनमा दाउरा खोज्न गएका बेला ४० वर्षीया गंगा श्रेष्ठलाई हात्तीले आक्रमण गरेको प्रहरीले जनाएको छ ।
सुन्दरहरैँचा नगरपालिकाका मेयर केदारप्रसाद गुरागाईं हात्तीले सर्वसाधारणलाई धेरै दुःख दिएको बताउँछन् । ‘हात्तीले हैरान बनायो । राति सुत्न पाइँदैन । रातभरि फोन आउँछ । साइरन बजाउन प्रहरी पुग्छन् । काहिलेकाहीँ दमकल नै पठाउनुपर्छ । हात्तीले आलु पनि उखेलेर खाइदिन्छ,’ उनले भने ।
हात्तीले अन्नबाली र घरहरुमा क्षति गरिरहेको गुरागाईंले बताए । पीडितले उचित क्षतिपूर्ति पनि नपाइरहेको उनको भनाइ छ । ‘एक लाख रुपैयाँ क्षति हुँदा माथिबाट १० हजार मात्रै आउँछ । सरकारले क्षतिपूर्तिलाई वैज्ञानिक बनाउनु पर्छ,’उनी भन्छन् ।
नगर प्रमुख गुरागाईंका अनुसार हात्तीलाई बस्तीमा प्रवेशका लागि रोक्न केन्द्र र प्रदेश सरकारसँग सहयोग माग गरिएको छ । ‘झापामा फेन्सिङ तारजाली गर्दा हात्ती केही रोकिएका छन् । हात्तीलाई रोक्नका लागि केन्द्र सरकारले सहयोग गर्नुपर्छ,’उनले भने ।
सुन्दरहरैँचाको उत्तरतर्फको सामुदायिक वनमा अहिले दैनिकजसो हात्ती देखा पर्छन् । करिब एक दर्जनाको संख्यामा हात्ती रहेको स्थानीयले बताए । सुन्दरहरैँचा–८ का वडाध्यक्ष खेमप्रसाद न्यौपाने त्रासले सर्वसाधारणले रातभर सुत्नसमेत नपाएको र हात्तीले मानवीय तथा भौतिक क्षति गर्ने क्रम बढेको बताउँछन् ।
‘हात्तीका कारण मानवीय तथा भौतिक क्षति बढ्यो । त्रासका कारण सर्वसाधारण रातभर जाग्राम बस्नुपर्छ,’उनले भने । न्यौपानेका अनुसार हात्तीले मानिसलाई आक्रमण गर्ने,घर भत्काइदिने र अन्नबाली नष्ट गरिदिने गरेको छ ।
पछिल्लो समय झापा, मोरङ र सुनसरीका पूर्व–पश्चिम राजमार्ग उत्तरका वन क्षेत्रमा हात्तीको चहलपहल बढेको छ । हात्तीले उपद्रो मच्चाउन थालेपछि सर्वसाधारण त्रसित बनेका छन् । प्रहरीका अनुसार सबैभन्दा धेरै झापा र मोरङमा मानवीय एवं भौतिक क्षति गरेको छ ।
पछिल्लो समय मोरङको सुन्दरहरैँचा, बेलबारी, केराबारीलगायतका स्थानमा दैनिकजसो हात्तीको हुल देखिने गरेको स्थानीयले बताए । उनीहरु मानव–हात्ती द्वन्द्वको व्यवस्थापनमा राज्यले ध्यान दिनुपर्ने बताउँछन्।
प्रतिक्रिया दिनुहोस !
