८४ को निर्वाचनमा कांग्रेस र एमालेसँग गठबन्धन हुँदैन : प्रचण्ड

विराटनगर : पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले भ्रष्टाचारविरुद्धको अभियानलाई देशव्यापी बनाउने बताएका छन् । त्यसका लागि पार्टीले हुलाकी मार्ग केन्द्रित तराई–मधेश जागरण अभियान सञ्चालन गरेको उनको भनाइ छ । भ्रष्टाचार विरोधी र सुशासनको कुरालाई जनताबीचमा लगेर आर्थिक विकास एवं समृद्धिका निम्ति जनचेतना अभिवृद्धि गर्ने उद्देश्य अभियानको रहेको दाबी प्रचण्डको छ । 

हुलाकी मार्ग केन्द्रित तराई–मधेश जागरण अभियानका क्रममा विराटनगरमा बुधबार बिहान आयोजित पत्रकार सम्मेलनमा बोल्दै उनले अहिलेको सरकार भ्रष्टाचारीलाई संरक्षण गर्ने उद्देश्यले बताएको आरोप लगाए । आफ्नो सरकारले भ्रष्टाचारीलाई कारबाहीमा ल्याउने अभियान चलाएपछि उनीहरूलाई संरक्षण गर्न कांग्रेस–एमाले गठबन्धनको सरकार बनेको उनको दाबी छ । 

‘हामीले सुशासन कायम गर्न खोज्यौं । भ्रष्टाचार विरोधी अभियान सुरु गरेबापत,भ्रष्टाचारीलाई कारबाहीको दायरामा ल्याउन थालेबापत भ्रष्टाचारीको संरक्षण गर्ने उद्देश्यले नै अहिलेको गठबन्धन सरकार बनेको हो’,प्रचण्डले भने ।

आफ्नो सरकारले सुरू गरेको भ्रष्टाचार विरोधी र सुशासनको अभियानलाई राष्ट्रव्यापी रुपमा जनताको बीचमा लैजान जागरण अभियान सुरु गरिएको उनको जिकिर छ । त्यसबाहेक अभियानको अर्को उद्देश्य दक्षिण भेगमा रहेका आदिवासी जनताति,मधेशी,थारुको मुद्दा स्थापित गर्नु र राष्ट्रिय एकता सुदृढ गर्नु नै रहेको प्रचण्डले बताए । 

पार्टीले जनताका समस्या बुझ्नलाई सुरू गरेको अभियानबाट आफू उत्साहित रहेको उनको भनाइ छ । अभियानले सिंगो पार्टी र जनतामा उत्साह छाएको दाबी प्रचण्डको भनाइ छ । भाषण गर्ने र हिँड्नेभन्दा पनि किसान,मजदुर,बुद्धिजीवी,तराई मधेका नागरिक समुदाय र आमजनतासँग सम्बन्ध सुदृढीकरण गर्न अभियान चलाइएको उनको स्पष्टोक्ति छ । 

कांग्रेस र एमालेसँग गठबन्धन गर्दा पार्टी कमजोर भएको प्रचण्डले बताए । ‘गठबन्धन तथा सरकारको सम्झौतामा केन्द्रित हुँदा पार्टी कमजोर भयो,’उनले भने,‘अब माओवादी जुरुक्कै उठ्ने वातावरण बनेको छ ।’विगतमा गठबन्धन गर्दा कांग्रेस र एमालेलाई ठूलो पार्टी बनाउन माओवादीले सहयोग गरेको दाबी गर्दै प्रचण्डले अब माओवादी एक्लै अगाडि बढ्ने संकल्प गरेको बताए । अबको चुनावमा कांग्रेस र एमालेसँग गठबन्धन नहुने उनको भनाइ छ । गठबन्धन नगरिकन माओवादी अगाडि जानसक्छ भन्ने संकेत उपनिर्वाचनले गरेको दाबी प्रचण्डको छ । 

उनले अबको निर्वाचनबाट पार्टी पहिलो बन्ने दाबीसमेत गरे । कांग्रेस र एमालेले सत्ताका लागि मात्रै संविधान संशोधनको कुरा उठाएको उनको आरोप छ । जनताले प्राप्त गरेको अधिकार खोस्न दुवै दलले चाहेको आरोपसमेत प्रचण्डले लगाए । 

पूर्वराजाले बोलेको कुरामा खासै प्रतिक्रिया दिन आवश्यक नरहेको उनको टिप्पणी छ । अब राजतन्त्र नेपालमा कुनै अवस्थामा फर्कन नसक्ने दाबी प्रचण्डले गरे । पार्टीमा कुनै विवाद नरहेको र एकताबद्ध भएर अभियानमा सिंगो टिम अगाडि बढेको उनको भनाइ छ । 

माओवादीले सरकारमा जानलाई ध्यान नदिएको उनले बताए । प्रचण्डले भ्रष्टाचार,कुशासन,कमिसन र बिचौलियाको संरक्षणमा मात्र केन्द्रित रहेको सरकार आफ्नै बोझले थिचिएका कारण कुनै पनि बेला भासिनसक्ने चिन्ता रहेको उल्लेख गरे । 

माओवादीले सञ्चालन गरेको तराई–मधेश जागरण अभियानको बुधबार तेस्रो दिन हो । झापाबाट सोमबार सुरू भएको अभियानको दोस्रो दिन माओवादीले मोरङका तीन ठाउँमा खबरदारी एवं जनसभा गरेको थियो ।