एमालेको दोस्रो विधान महाधिवेशन भदौमा, जेठ मसान्तभित्र सुझाव दिन परिपत्र

काठमाडौं : नेकपा एमालेको दोस्रो विधान महाधिवेशन आगामी भदौ २० गतेदेखि २२ गतेसम्म हुने भएको छ। एमालेको सचिवालय बैठकले विधान महाधिवेशनको मिति तोकेसँगै पार्टीको संगठन विभागले सबै कमिटीहरुलाई विधान महाधिवेशनमा समेट्नु पर्ने विषय पठाउन परिपत्र गरेको हो।

संगठन विभागका सचिव माधव ढुंगेलले जारी गरेको परिपत्रमा पार्टीका सबै कमिटी र कार्यकर्ताबाट पाटीले लिनुपर्ने नीति र विधिका बारेमा राय सुझाव संकलन गर्न निर्देशन दिइएको छ। आगामी जेठ मसान्तसम्म सुझाव संकलन गरेर पार्टी केन्द्रमा पठाउन सर्कूलर जारी भएको हो। पार्टी कमिटी र सदस्यले सुझाव दिन सक्ने बताइएको छ।
 

एमाले विधानअनुसार ५ वर्षमा पार्टीको राष्ट्रिय महाधिवेशन गर्नुपर्ने व्यवस्था छ। विधान अनुसार एमालेले आगामी २०८३ मङ्सिर दोस्रो साता ११ औँ महाधिवेशन गर्नुपर्ने हुन्छ।  एमाले विधानको धारा १३ मा भनिएको छ,‘राष्ट्रिय महाधिवेशन पार्टीको सर्वोच्च संस्था हुनेछ र यसको आयोजना केन्द्रीय कमिटीले सामान्यतया हरेक पाँच वर्षमा गर्नेछ।’ यसबाहेक संवैधानिक व्यवस्था अनुसार विशेष परिस्थितिमा ६/६ महिना गरी थप एक वर्ष पछि सार्न पनि सकिनेछ । राष्ट्रिय महाधिवेशन अगावै विधान महाधिवेशन हुन लागेको हो। एमालेले २०७८ सालको असोजमा विधान महाधिवेशन गरेको थियो।