गोरखा : गोरखाकी एक जिल्ला समन्वय समिति गोरखाकी सदस्यका दम्पतीले ज्याला मजदुरी गरी खाने महिलामाथि कुटपिट गरेकी छन् । अजिरकोट गाउँपालिका- ५ बाट जिसस सदस्यमा निर्वाचित इन्दिरा देवकोटा र उनका श्रीमान् निवृत्त शिक्षक रामचन्द्र देवकोटाले सोही ठाउँकी ३५ वर्षीया कल्पना धिताललाई लछारपछार पार्दै कुटपिट गरेका हुन् ।
पीडित धितालको भच्चेक स्वास्थ्य चौकीमा सामान्य उपचार र गोरखा अस्पतालमा थप उपचार गरी बुधबार घर फर्किएकी छिन् । काम गरेको ज्याला माग्न जाँदा देवकोटा दम्पतीले आफूमाथि कुटपिट र लछारपछार गरेको पीडित महिलाको दुखेसो छ । ‘उनीहरू नाताले मेरो जेठाजु जेठानी हुन् । केही दिनअघि घरपछाडिको करेसा सफा गर्न लगाएका थिए’, धितालले भनिन्, ‘काम गरेकोे ज्याला माग्न जाँदा कपालमा समातेर लछारपछार पारे । कुटपिट पनि गरे ।’ देवकोटा दम्पतीले यसअघि पनि बारम्बार आफूमाथि यस्तो दुव्र्यवहार गर्ने गरेको उनले बताइन् ।
इन्दिरा देवकोटा नेकपा माओवादीको तर्फबाट निर्वाचित जिसस सदस्य हुन् । उनका श्रीमान् रामचन्द्र देवकोटा अजिरकोट २ स्थित स्यार्तान आधारभूत विद्यालयबाट निवृत्त भएका शिक्षक हुन् । देवकोटाले जनप्रतिनिधि भएकै हैसियतले आफूहरूलाई धम्क्याउने र तर्साउने गरेको पीडित कल्पनाकी १३ वर्षकी छोरी आयुषा धितालले बताइन् ।
प्रदेश अस्पताल गोरखामा उपचाररत कल्पना धिताल । तस्बिर : शिव उप्रेती
आमासँग प्रदेश अस्पताल गोरखामा आएकी आयुषा अजिरकोट–५ मुच्चोकस्थित चर्तुमाला माविको कक्षा आठमा अध्ययनरत छिन् । इन्दिरा देवकोटाले पाँच सय रुपैयाँका लागि आफ्नो आमालाई पिट्ने, जबरजस्ती कपालमा समाएर लछारपछार पार्ने र पानीमा मुख डुबाउने जस्ता क्रियाकलापहरू गरेको आयुषा बताउँछिन् । ‘उनीहरूको र हाम्रो घर नजिकै छ ।
आइतबार बिहान आमा काम गरेको पैसा माग्न जानुभएको थियो । त्यहीबेला उनीहरूले पैसा दिनुको साँटो नराम्रो व्यवहार गरेर कुटपिट गरे’, १३ वर्षकी उनले भनिन्, ‘आमा रोएको, कराएको सुनेर म पनि पुगेँ । इन्दिरा देवकोटाको बुढाबुढीले आमालाई लछारपछार पारेको, पानीमा मुख डुबाएको भिडियो पनि खिचेको छु । अहिले त्यो भिडियो डिलिट गर भनेर धम्क्याएका छन् । तर, भिडियोहरू सुरक्षित छन् ।’
उनले लिएको भिडियोमा इन्दिरा देवकोटा र उनको श्रीमान् रामचन्द्र देवकोटाले कल्पना धितालको कपालमा समाएर लछारपछार पर्दै पानीमा मुख डुबाएको देखिन्छ । स्थानीय युवाहरूले सो भिडियो सामाजिक सञ्जालमा पोस्ट र सेयर गरेर भाइरल बनाएका छन् । आयुषा घरको तनाव र देवकोटा दम्पतीको धाकधम्कीका कारण हाल पढाइ छोडेको बताउँछिन् ।
‘आमालाई यसअघि पनि यसरी पिट्ने, ठूलबाबा (रामचन्द्र देवकोटा) रक्सी खाएर हातपात गर्न खोज्नुहुन्थ्यो । यो पटक भने सारै गर्नुभयो’, उनले भने, ‘यही तनावहरूले गर्दा पढ्न पनि गाको छैन । अब घरको अवस्था शान्त भएपछि मात्र पढ्ने होला ।’ पीडित कल्पना धितालको श्रीमान् तुलसीप्रसाद धिताल अजिरकोट–५ मुच्चोककै जनप्रभात प्राविमा कार्यालय सहयोगी छन् । यस विषयमा जानकारी लिन जिसस सदस्य देवकोटालाई टेलिफोनमा सम्पर्क गर्दा उनले प्रतिक्रिया दिन आलटाल गरिन् ।
प्रतिक्रिया दिनुहोस !
