जनकपुरधाम :
घटना १ : धनुषाका सक्रिय पत्रकार शिवेन्द्र रोहिताको गत वर्ष सवारी दुर्घटनामा मृत्यु भयो । जनकपुरधाम— ९ थापाचोकमा एकाबिहानै बा २१ च ३३४३ नम्बरको कारले पत्रकार रोहिता चढेको मोटरसाइकललाई ठक्कर दिएको थियो । रोहिताको घटनास्थलमै मृत्यु भएको थियो ।
घटना २ : रौतहटको वृन्दावन क्षेत्रमा खेतबाट बाटोमा चढाउन खोज्दा शनिबार ट्र्याक्टरको अगाडिको भाग उठ्यो । च्यापिएर चालकको मृत्यु भयो । ट्र्याक्टर चालक वृन्दावन— ७ का नजामोदिन मन्सुरी हुन ।
घटना ३ : पर्साको वीरगन्ज महानगरपालिकामा सवारी दुर्घटनामा परी दुई जनाको मृत्यु भयो । महानगरपालिका— २२ स्थित ड्राइपोर्ट सडकखण्डअन्तर्गत सीताराम चोकमा भएको सवारी दुर्घटनामा परी पर्सा छिपहरमाई गाउँपालिका— ३ झलमैया टोल निवासी रामाकान्त यादव र सोही ठाउँका विजय यादवको मृत्यु भएको थियो । अर्का एक जना २२ वर्षीय विजयकुमार यादव गम्भीर घाईते भए ।
यी त केही उदाहरणमात्रै हुन् । मधेस प्रदेशमा पछिल्लो समय सवारी दुर्घटनाको निकै बढेको छ । पछिल्लो तीन वर्षमा मात्रै सवारी दुर्घटनामा १ हजार ५ सयभन्दा बढी व्यक्तिको ज्यान गइसकेको छ । मधेस प्रदेश प्रहरी कार्यालय जनकपुरधामका अनुसार यस अवधिमा १८ हजार सवारी दुर्घटना भए । जसमा १ हजार ५ सय ५ जनाको ज्यान गुमाएको प्रदेश प्रहरी कार्यालयको भनाइ छ ।
गत महिना मधेस प्रदेशमा सुरक्षा निकायका सबै अंगका अधिकृतको गोष्ठी भयो । गृहमन्त्री रमेश लेखकले सबैभन्दा ठूलो समस्या नै सवारीसाधन दुर्घटना रहेको गोष्ठीमा बताए । ‘सवारीसाधन दुर्घटना र लागुऔषध अहिले देशका लागि प्रमुख दुई ठूला समस्या हुन,’ गृहमन्त्री लेखकले भनेका थिए,
‘पछिल्लो समय मधेसमा लागुऔषधको बढ्दो प्रयोगले सबै क्षेत्रलाई प्रभावित गरेको छ । यसको सेवन गर्नेहरूबाटै बढी अपराध भएका छन् । यसको सेवन गरेर सवारी चलाउँदा दुर्घटना भएका छन् र अन्य विभिन्न खालका सामाजिक समस्याहरू बढेका छन् । त्यसैले यस्तो गतिविधिलाई नियन्त्रण गर्न प्रहरी प्रशासन अझ बढी सक्रिय हुनु आवश्यक छ ।’
चालु आर्थिक वर्ष ०८१/०८२ मा प्रदेशभरि १ हजार ८ सय २ सवारी दुर्घटना भए । यी दुर्घटनाहरूमा परी ४ सय २९ जनाले ज्यान गुमाए । २ हजार ४ सय ४ जना गम्भीर घाइते भए । सामान्य घाइते हुनेको संख्या ७ हजार ४ सय ४८ थियो । प्रहरीको कारबाहीमा १ लाख ७२ हजार ३ सय ८ जना परेका थिए र तिनीहरूबाट १५ करोड २१ लाख १० हजार ३ सय ५८ रुपैयाँ राजस्व संकलन भएको हो ।
आव ०८०/०८१ मा प्रदेशमा ६ हजार ५८ सवारी दुर्घटना भए । जसमा ५ सय ३० जनाले ज्यान गुमाए । २ हजार २ सय ४९ जना गम्भीर घाइते भए । त्यसैगरी ७ हजार ४ सय ९६ जना सामान्य घाइते भएका थिए । सो बेला २ लाख ५९ हजार २ सय ३ व्यक्ति कारबाहीमा परेका थिए र जसबाट २३ करोड ३० लाख ७९ हजार ७ सय ५६ रुपैयाँ राजस्व संकलन भएको थियो ।
प्रहरीका अनुसार आर्थिक वर्ष ०७९/०८० मा ५ हजार ९ सय ८८ सवारी दुर्घटना भए । ती दुर्घटनाहरूमा परी ५ सय ४६ जनाले ज्यान गुमाएका थिए । यी दुर्घटनाहरूमा गम्भीर घाइते हुनेहरूको संख्या २ हजार २ सय थियो । सो बेला ३ लाख ५३ हजार १ सय ८३ जनालाई प्रहरीद्वारा कारबाही गरिएको थियो र ती कारबाहीहरूबाट २६ करोड ८६ लाख ८६ हजार ५ सय रुपैयाँ राजस्व संकलन भएको थियो ।
‘मधेसमा हरेक युवासँग अहिले दुईपांग्रे सवारीसाधन देखिन्छन् । तर, तिनको प्रयोग गर्दा अत्यधिक लापरबाही हुने गरेको छ,’ मधेस प्रदेशका गृह, सञ्चार तथा कानुनमन्त्री राजकुमार लेखी भन्छन्, ‘ट्राफिक नियमको अवहेलना, मादक पदार्थ सेवन गरेर सवारी चलाउने, हेलमेटको बेवास्ता गर्ने र तीव्र गतिमा सवारी चलाउनेजस्ता कारणले सयौं युवाले प्रत्येक वर्ष ज्यान गुमाउनु परिरहेको छ । यसलाई न्यूनीकरण गर्न समुदाय, परिवार र सरकार सबै पक्ष मिलेर सचेतना अभियानमा लाग्नु आवश्यक छ ।’
प्रतिक्रिया दिनुहोस !
