विराटनगर : चेक अदालत मुद्दामा दोषी ठहर भएका एक जना प्रतिवादी जिल्ला अदालत मोरङ परिसरबाटै फरार भएका छन् । कारागार चलान गर्न लगिएका प्रतिवादी विराटनगर महानगरपालिका–१३ का ४० वर्षीय विजय शंकर झा अदालत परिसरबाटै सोमबार दिउँसो ३ बजेतिर फरार भएको मोरङ प्रहरी प्रवक्ता डीएसपी कोपिला चुँडालले जानकारी दिइन् । उनका अनुसार झालाई सुनसरीको दुहबीबाट आइतबार पक्राउ गरेर जिल्ला प्रहरी कार्यालय मोरङ ल्याइएको थियो ।
चेक अनादर मुद्दामा मोरङ अदालतबाट दोषी ठहर भएका उनी सजाय भुक्तान नगरिकन फरार बनिरहेका प्रतिवादी हुन् । नागेश्वरप्रसाद साहले ७ लाख ५० हजार बिगो र त्यसको ब्याज दाबी गरेर झाविरुद्ध अदालतमा फिरादपत्र दर्ता गराएका थिए ।
जिल्ला अदालत मोरङका सूचना अधिकारी हेमबहादुर बुढाथोकीका अनुसार अदालतले २०८० साल माघ २३ गते झाबाट बिगोबापतको रकम र ब्याज साहलाई भराउनुपर्ने फैसला गरेको थियो । फैसला बमोजिम झाले रकम नतिरेपछि उनलाई कैद राखिदिनुपर्ने माग गर्दै साह पुनः अदालत पुगे । फैसला अनुसार आफूले रकम नपाएका कारण झालाई कैदमा राखिदिनुपर्ने माग गर्दै साहले निवेदन दिए ।
साहकै माग बमोजिम झालाई २ वर्ष कैदमा राख्न अदालतबाट आदेश भएको सूचना अधिकारी बुढाथोकीले बताए । तर, झा कैद भुक्तान नगरिकन भागिरहेका थिए । विशेष सूचनाका आधारमा जिल्ला प्रहरी कार्यालय मोरङबाट खटिएको टोलीले दुहबीबाट पक्राउ गरेर कारागार चलानका लागि सोमबार अदालतमा पेस गर्न लगेको थियो ।
प्रहरीले फरार प्रतिवादीलाई पक्राउ गरेर अदालतमा बुझाउने गरेको छ । प्रहरीले बुझाएपछि अदालतले सजाय भुक्तान गर्न कारागार चलान गर्नुपर्ने हुन्थ्यो । तर, पिसाब गर्न शौचालय जान्छु भनेर प्रहरीलाई छल्दै झा फरार भएको जानकारी डीएसपी चुँडालले दिइन् ।
झालाई अदालतमा पेस गर्नका लागि प्रहरी हवल्दार विकास सिंहको टोलीले बुझेर लगेको थियो । तर, ‘शौचालय जान्छु’ भन्दै फरार भएपछि अदालतले कारागार चलान गर्न सकेन । डीएसपी चुँडालले फरार भएका झाको खोजी तीव्र पारिएको बताइन् । उनले भनिन्, ‘घटनामा लापरबाही देखिएकाले प्रहरीमाथि छानबिन सुरु गरिएको छ । प्रहरीले निगरानीमा राख्न नसक्दा कारागार चलान गर्नुपर्ने प्रतिवादी अदालत परिसरबाटै फरार भएको पाइयो ।’
प्रतिक्रिया दिनुहोस !
