सुदूरपश्चिम सरकारलाई दिएको समर्थन फिर्ता लिने नगरिक उन्मुक्तिको निर्णय

धनगढी : नागरिक उन्मुक्ति पार्टी संसदीय दलले सुदूरपश्चिम प्रदेश सरकारलाई दिएको समर्थन फिर्ता लिने निर्णय गरेको छ। पार्टीबाट सरकारमा प्रतिनिधित्व गरेका उद्योग, पर्यटन, वन तथा वातावरणमन्त्री रामेश्वर चौधरीलाई मुख्यमन्त्री कमलबहादुर शाहले पदमुक्त गरेपछि धनगढीमा आज बसेको संसदीय दलको बैठकले सरकारलाई दिएको समर्थन फिर्ता लिने निर्णय गरेको हो। 

मुख्यमन्त्री शाहले मन्त्री रामेश्वर चौधरीलाई बिहीबार पदमुक्त गरेका थिए। बैठकपछि संसदीय दलका नेता घनश्याम चौधरीले पार्टीको केन्द्रबाट सरकारलाई दिएको समर्थन फिर्ता लिने सम्बन्धमा आएको पत्रको आधारमा समर्थन फिर्ता लिने निर्णय गरिएको जानकारी दिए। प्रदेशसभामा चौथौ ठूलो दल नाउपाका सात प्रदेशसभा सदस्य छन्। 

सो पार्टीले समर्थन फिर्ता लिने निर्णय गरेपनि शाह नेतृत्वको सरकारको पक्षमा बहुमत कायम छ। सरकारको आर्थिक पारदर्शिता र सुशासन कायम गर्ने सवालमा गरिएको आग्रहलाई वेवास्ता गरिएपछि मन्त्री चौधरी पदमुक्त भएको मुख्यमन्त्रीको सचिवालयले जनाएको छ।