काठमाडौं : पाँच वर्षको लामो प्रतीक्षापछि भारतले चिनियाँ पर्यटकका लागि आफ्नो ढोका पुनः खोलेको छ। चिनियाँ नागरिकले जुलाई २४ देखि भारतीय पर्यटक भिसा पाउने छन्। बेइजिङस्थित भारतीय दूतावासले बुधबार दुई देशबीचको सम्बन्धमा नयाँ न्यानोपनको आशा भएको जनाएको छ।
२०२० मा भारतले कोभिड–१९ महामारी रोक्न सबै पर्यटक भिसा रद्द गरेको थियो। तर अब चिनियाँ नागरिकले बेइजिङ, सांघाई र ग्वाङ्झाउस्थित भारतीय भिसा केन्द्रमा अनलाइन आवेदन दिएर भिसा प्राप्त गर्नेछन्।
दूतावासले बेइजिङस्थित भारतीय भिसा केन्द्रमा बुझाइएका आवेदनका लागि राहदानी फिर्ता गर्दा राहदानी फिर्ता पत्र दिनुपर्ने स्पष्ट पारेको छ। प्रक्रियालाई अझ पारदर्शी बनाउन यो कदम चालिएको दूतावासले जनाएको छ।
कोभिड–१९ र २०२० को गलवान उपत्यकाको झडपपछि भारत र चीनबीचको यात्रा र सम्बन्धमा नराम्रो असर परेको थियो। चीनले भारतीय विद्यार्थी र व्यवसायीका लागि भिसा बिस्तारै पुनः सुरु गरे पनि सामान्य यात्रा प्रतिबन्धित नै राखेको छ। गलवान झडपपछि दुई देशबीचको सम्बन्ध १९६२ को युद्धपछिको बिन्दुमा पुगेको थियो।
प्रतिक्रिया दिनुहोस !
