पद जोगाउन मन्त्री बाँड्दै लामा, हस्ताक्षरमा अडिग राख्न बानियाँको कसरत

हेटौंडा : बागमती प्रदेशका मुख्यमन्त्री बहादुरसिं लामा पद जोगाउन पार्टीका प्रदेश सदस्यलाई ‘मन्त्रीको अफर’ गरिरहेका छन् । कांग्रेस बागमती प्रदेश संसदीय दलको नेताबाट हटाउन अविश्वास प्रस्ताव दर्ता भएपछि लामा पद जोगाउन सबैखाले प्रयासमा जुटेका हुन् । 

आफूविरुद्ध अविश्वास प्रस्ताव दर्ता गराउने सांसदहरूलाई मन्त्री बनाउन उनी प्रयासरत छन् । मुख्यमन्त्री लामालाई दलको नेताबाट हटाउने अभियानको नेतृत्व गरिरहेका कांग्रेस बागमती प्रदेशका सभापति तथा प्रदेशसभा सांसद इन्द्र बानियाँ अविश्वास प्रस्तावमा हस्ताक्षर गर्ने सांसदहरूलाई आफ्ना पक्षमा ‘जोगाउन’ लागिपरेका छन् । 

उनले अविश्वास प्रस्तावमा हस्ताक्षर गरेका केही सांसदलाई दुई दिनसम्म हेटौंडाको एक होटलमा राखेर हस्ताक्षरमा अडिन थप परिपक्क बनाएका थिए । अविश्वास प्रस्तावमा हस्ताक्षर गर्ने केही सांसदलाई आफ्नो पक्षमा ल्याइसकेको मुख्यमन्त्री लामाको दाबी छ । ‘केही दिनमै मन्त्रीहरू नियुक्त हुन्छन्, म त्यही प्रयासमा छु’, उनले भने, ‘मेरै नेतृत्वमा सरकार अघि बढ्छ, नेताहरूसँग पनि यही ढंगले छलफल भएको छ ।’ गत शुक्रबार कांग्रेसका २१ सांसदले दल नेता लामाविरुद्ध अविश्वास प्रस्ताव दर्ता गरेका थिए । तीमध्ये चारजना मन्त्रीले पदबाट राजीनामा दिए । रिक्त पदमा आफूहरुविरुद्ध हस्ताक्षर गर्नेमध्येकै सांसदलाई नियुक्त गरेर आफ्नो पक्षमा बहुमत कायम राख्न मुख्यमन्त्री लामा प्रयासरत छन् । 

संसदीय दलका नेताविरुद्ध अविश्वास प्रस्ताव दर्ता भएपछि १५ दिनभित्र दल नेताले यसबारे छलफल गर्नुपर्ने र सहमति नभए निर्वाचनमा जानुपर्ने कांग्रेस संसदीय दलको विधानमा छ । त्यसका लागि कांग्रेसले प्रतिनिधिसभा सदस्य राजेन्द्र  केसीलाई बागमती प्रदेशको संसदीय दलमा देखिएको विवाद मिलाउने जिम्मेवारी दिएको छ । विवाद मिलाउने जिम्मेवारी पाएका    श्रेष्ठले सोमबार दिउँसो १ बजेका लागि दुवै पक्षबीच छलफल राखिएको बताए । ‘छलफलमा सहमति नभए प्रक्रियामा जान्छ, त्यो भनेको निर्वाचन हो’, उनले भने । 

कांग्रेस बागमती प्रदेश संसदीय दलका उपनेता रामकृष्ण चित्रकारले सहमतिको प्रयास भइरहेको बताए । ‘सबै सम्भावनाको ढोका खुला छ, तर हाम्रो जोड सहमति होस् भन्नेमा छ’, उनले भने । संसदीय दलको विधानअनुसार पहिलो चरणमा अविश्वास प्रस्तावमा भएको हस्ताक्षर सनाखतको काम हुने चित्रकारले बताए ।

‘हस्ताक्षर आफैंले गरेको हो/होइन ?  २५ प्रतिशत बढीले हस्ताक्षर गरेको पुष्टि भएमा संसदीय दलको बैठकमा छलफल हुन्छ, त्यहाँ सांसदहरूले आफ्नो हस्ताक्षर फिर्ता पनि लिन सक्छन्’, उनले भने । छलफलपछि सहमति नभए अविश्वास प्रस्तावमा मतदान हुन्छ । मतदानमा कम्तीमा १९ जना प्रदेशसभा सदस्यले अविश्वास प्रस्तावको पक्षमा मतदान गरेमा दल नेताबाट लामा पदमुक्त हुनेछन् । 

बागमती प्रदेशसभामा कांग्रेसका ३७ जना सांसद छन् । नेताको पद रिक्त भएपछि नयाँ नेता चयनको निर्वाचन प्रक्रिया अघि बढ्नेछ । मुख्यमन्त्री लामाले सबै प्रक्रिया सामना गर्न चाहेमा यो प्रक्रिया मुख्यमन्त्री परिवर्तन वा उनी यथावत् रहने विषय टुंगो लाग्न कम्तीमा तीन साता लाग्नेछ । उनीविरुद्ध पार्टी सभापति शेरबहादुर देउवा, नेता प्रकाशमान सिंह र महामन्त्री गगन थापापक्षीय सांसदहरूले हस्ताक्षरसहित अविश्वास प्रस्ताव दर्ता गरेका छन् । तर, बागमतीमा दल नेता र मुख्यमन्त्री परिवर्तन गर्दा यसको असर अन्य प्रदेश र पार्टी केन्द्रमा पनि पर्ने डरले नेताहरूले सबै कोणबाट छलफल गरिरहेका छन् । 

हाल बानियाँका पक्षमा २१ र लामाका पक्षमा १६ प्रदेशसभा सदस्य देखिएका छन् । कांग्रेस बागमती प्रदेश दल नेताका लागि यसअघि भएको मतदानमा लामाका पक्षमा २१ र बानियाँका पक्षमा १६ प्रदेशसभा सदस्यले मतदान गरेका थिए ।