कक्षा १२ को पनि सुध्रियो नतिजा

काठमाडौं : राष्ट्रिय परीक्षा बोर्डले सोमबार सार्वजनिक गरेको कक्षा १२ को नतिजामा यस वर्ष नियमिततर्फ ६१.१७ प्रतिशत विद्यार्थी उत्तीर्ण भएका छन् । कुल ५ लाख १० हजार ९ सय ८७ विद्यार्थीमध्ये २ लाख ८४ हजार ३ सय ५ विद्यार्थी ग्रेडेड अर्थात् उत्तीर्ण भएका छन् ।

ग्रेडेडमध्ये पनि नियमिततर्फ ३ लाख ९६ हजार ३ सय ४७ विद्यार्थी सहभागी भएकोमा सबै विषयमा २ लाख ४२ हजार ४ सय ६५ ग्रेडेड हुन सफल भएका छन् । नियमिततर्फको ग्रेडेड कुल संख्याको ६१.१७ प्रतिशत हो । नियमिततर्फ सहभागीमध्ये ११ जनाको परीक्षा रद्द भएको थियो । 

बोर्डका अध्यक्ष डा.महाश्रम शर्माले नतिजा सार्वजनिक गर्दै परीक्षामा सहभागी कुल विद्यार्थीमध्ये आंशिकतर्फ १ लाख १४ हजार ६ सय ४० ले परीक्षा दिएको जनाए । यसरी परीक्षा दिएका आंशकितर्फ ४१ हजार ८ सय ४० जना विद्यार्थी सबै विषयमा ग्रेडेड भएको उनले बताए । आंशिकमा सहभागीमध्ये ३६.४९ प्रतिशत उत्तीर्ण भएका छन् ।

आंशिकतर्फ ६ जना विद्यार्थीको परीक्षा रद्द गरिएको छ । दुवै गरेर १७ जना विद्यार्थीको परीक्षा रद्द भयो । यसअनुरूप नियमित र आंशिकमा २ लाख २६ हजार ६६५ विद्यार्थी नन ग्रेडेड अर्थात् अनुत्तीर्ण भएको उनले जनाए । उक्त ननग्रेडेड विद्यार्थीका लागि आगामी भदौ २८ र २९ गते ग्रेड वृद्धि परीक्षा हुने भएको छ । 

गत शैक्षिक वर्ष २०८१ मा सोही तहमा नियमिततर्फ कुल ३ लाख ९० हजार ८ सय ६८ विद्यार्थीले परीक्षा दिएका थिए । कुल विद्यार्थीमध्ये ५२.९१ प्रतिशत विद्यार्थी उत्तीर्ण हुन सफल भएका थिए । अघिल्लो वर्ष (२०८०)मा कुल विद्यार्थीको करिब ५१ प्रतिशत हाराहारीमा उत्तीर्ण भएका थिए । ‘राज्यले समग्र शिक्षामा ध्यान दिनुपर्छ ।’ 

राष्ट्रिय परीक्षा बोर्डले गत ११ वैशाखका लागि परीक्षाको मिति तोके पनि शिक्षकहरूको अनिश्चितकालीन आन्दोलनले प्रभावित भएपछि वैशाख २१ देखि जे भएको थियो । पूर्वघोषित समयभन्दा १० दिनपछि भएको परीक्षामा सहभागी कुल विद्यार्थीमध्ये ६१.१७ प्रतिशत विद्यार्थी उत्तीर्ण हुन सफल भएका छन् । यद्यपि यो नतिजा गत वर्षको नतिजाभन्दा ८.२६ प्रतिशतले बढी हो ।

यो सुधारलाई सकारात्मक लिनुपर्ने बताउँछन्, शिक्षाविद् डा.विष्णु कार्की । शिक्षक, अभिभावक र परीक्षा नियन्त्रण कार्यालय सबैले गरेको प्रयासका लागि प्रशंसा गर्नुपर्छ । उनका अनुसार विगतमा ३०–४० प्रतिशत मात्र विद्यार्थी पास हुने अवस्थाबाट ६० प्रतिशत नाघ्नु राम्रो प्रगति हो । 

‘यसलाई सकारात्मक रूपमा लिनुपर्छ । तर, अबको योजना के हो भन्ने प्रश्न उठ्छ । नेपाली र सामाजिक जस्ता विषयमा ‘नन–ग्रेड’ हुने विद्यार्थीको संख्या अझै बढी छ । तराईका जिल्लाहरूमा विद्यार्थी उत्तीर्ण हुने दर कम देखियो । ‘राज्यले पास प्रतिशत बढाउने मात्र नभई, समग्र शिक्षामा ध्यान दिनुपर्छ,’ उनले सुझाव दिए । यसैबीच अहिले राम्रो नतिजा आयो भन्दैमा शिक्षा मन्त्रालय र परीक्षा नियन्त्रण कार्यालय चुप लागेर बस्न नहुनेतर्फ उनले ध्यानाकर्षण गरे । 

‘धेरै विद्यार्थी विदेश जान हतार गरिरहेका छन्, यस विषयमा राज्यको कुनै योजना देखिँदैन । राज्यले विद्यार्थी पास हुने कुराको ग्यारेन्टी गर्नुपर्छ । हाल करिब ५ लाख विद्यार्थीले कक्षा १२ को जाँच दिए, जसमध्ये लगभग ३ लाख पास भए । करिब २ लाख विद्यार्थी कहाँ हराए, उनीहरूको भविष्य के हुन्छ भन्ने प्रश्न महत्वपूर्ण छ’, उनले अन्नपूर्णसँग भने ।