अर्घाखाँची : लुम्बिनी प्रदेशको पहाडी जिल्ला अर्घाखाँचीमा ग्रामीण सडकहरू कालोपत्रे तथा स्तरोन्नतिको कार्यले गति लिन थालेको छ । गाउँगाउँका सडकहरू कालोपत्रे, ग्राभेल तथा स्तरोन्नति भएपछि स्थानी खुसी भएका छन् ।
जिल्लाका टोलटोलमा सडक विस्तार भएको अर्घाखाँचीमा पछिल्लो समय गाउँबस्तीमा समेत कालोपत्रेले तीव्रता पाएको छ । कालोपत्रे भएपछि बर्खामा समेत यातायात सहज भएको छ । वर्षामा हिलाम्मे र हिउँदा धुलाम्मे हुने सडकहरूमा अहिले १२ महिना नै सरर सवारीसाधनहरू चल्ने गरी सडक पूर्वाधार विकास कार्यालय, खानेपानी तथा सहरी विकास कार्यालय र स्थानीय सरकारहरू पनि सडक कालोपत्रे, ग्राभेल तथा स्तरोन्नतिमा काम गरिरहेका छन् ।
सडक गत आर्थिक वर्ष २०८१/८२ मा निर्माणको काम अगाडि बढेका हुन् । सडक पूर्वाधार विकास कार्यालय, अर्घाखाँचीले १ सय ८७ आयोजनामध्ये १ सय ४५ वटा सडक आयोजनाको निर्माण कार्य सम्पन्न गरेको छ ।
कार्यालय प्रमुख इन्जिनियर गोपीराज पुनका अनुसार आर्थिक वर्ष २०८१/८२ मा जिल्लाका विभिन्न स्थानमा २७.६३ किलोमिटर सडक कालोपत्रे, ५.३७ किलोमिटर सडक ढलान, २७.६७ किलोमिटर सडक ग्राभेल र ३.२ किलोमिटर नयाँ सडक खन्ने कार्य पूरा भएको छ । २ वटा झोलुंगेपुलको बृहत् मर्मत र एउटा स्ल्याब कल्भर्ट निर्माण कार्य पनि सकिएको छ ।
प्राविधिक जनशक्तिको अभाव र विभिन्न चुनौतीका बाबजुद कुल १४ दरबन्दीमध्ये ११ जना मात्र कार्यरत रहेको र प्राविधिक जनशक्ति केबल ६ जना हुँदा पनि कार्यालयले जिल्लाको विकास निर्माणमा प्रशंसनीय काम गरेको हो । आर्थिक वर्ष २०८१/८२ मा कार्यालयले यस अवधिमा कार्यालयले पुँजीगत बजेटमा ७५.७५ प्रतिशत वित्तीय प्रगति हासिल गरेको छ । १ अर्ब २ करोड ३६ लाख रुपैयाँ योजना सम्पन्न गर्न रकम खर्च भएको मगरको भनाइ रहेको छ । बहुवर्षीय जिल्लाका गौरवमा ११ योजना निर्माणधीन अवस्थामा रहेका छन् । स्रोत प्राप्त भएका ९ वटा बहुवर्षीय सडक, पुलहरूको बोलपत्र आह्वान गरिएको कार्यालयले जानाकारी दिएको छ ।
जिल्लामा प्रदेश गौरवको आयोजनाका रूपमा रहेको ‘रामपुर–कपुरकोट सडक’ (जीवराज आश्रित–कृष्णसेन इच्छुक मार्ग)लगायत ११ वटा सडक तथा पुल आयोजनाहरू हाल निर्माणाधीन अवस्थामा रहेको कार्यालयका इन्जिनियर टोपबहादुर दर्लामीले बताएका छन् । यीमध्ये ९ वटा बहुवर्षीय आयोजनाहरू छन्, जसमा विभिन्न गाउँपालिका पहुँच मार्ग, सडक पुल र बक्स कल्भर्ट समावेश रहेको कार्यालय प्रमुख इन्जिनियर पुन मगरको भनाइ छ ।
कार्यालयले आगामी आर्थिक वर्ष २०८२/८३ मा निर्माणाधीन ९ मध्ये ८ वटा आयोजना सम्पन्न गर्ने लक्ष्य राखेको छ । यस वर्ष १४५ सडक योजना निर्माण सम्पन्न भएका छन् । अर्घाखाँचीमा ६ स्थानीय तह रहेकोमा सबैले सडकलाई प्राथमितामा राखेका छन् । सन्धिखर्क नगरपालिकाले अहिलेसम्म २३ किलोमिटर सडक कालोपत्रे गरेको छ । गत वर्ष मात्रै ४.८ किलोमिटर कालोपत्र गरेको प्रावधिक प्रमुख प्रमोद केसीले जानकारी दिए ।
जिल्लाको पाणिनी गाउँपालिकाले गाउँपालिका र संघ सरकारको समपुरक योजनाअन्तर्गत पाणिनी गाउँपालिकाले भञ्ज्याङ–धातिवाङ–डाडाँकटेरी सडकअन्तर्गत झन्द्रेक र धातिवाङको फेदीखोलामाथि पक्की ढलान ३ सय ५० मिटर गरेको पाणिनी ६ का वडाध्यक्ष कृष्णप्रसाद पौडेलले जानकारी दिए । शीतगंगा नगरपालिकाले झोलुंगेपुल सुवर्णखाल र ठाडा जुकेना गल्दा सडकलाई कालोपत्रे गरेको छ । छत्रदेव गाउँपालिकाले गत वर्ष ५ किलोमिटर सडक कालोपत्रे गरेको प्राविधिक प्रमुख साजन पाण्डेले बताए ।
भूमिकास्थान नगरपालिकामा हालसम्म ४२ किलोमिटर सडक कालोपत्रे गरेको छ । आव २०८१/८२ नगरपालिकाले ३ किलोमिटर सडक कालोपत्रे गरेको अधिकृत शेषकान्त घिमिरेले जानकारी दिएका छन् । मालारानी गाउँपालिकामा ०८१/८२ मा ३.५ किलोमिटर सडक कालोपत्रे भएको छ । अब ८ किलोमिटर सडक पिचका लागि स्ट्रकचर तयार भएको प्रमुख प्रशासकीय अधिकृत गोविन्द भट्टराईले बताए ।
प्रतिक्रिया दिनुहोस !
