काठमाडौं : अमेरिकाबाट कर (ट्यारिफ)सम्बन्धी विशेष छुट प्राप्त भएको पुष्टि भएपछि जापानको सेयर बजारमा उल्लेखनीय वृद्धि भएको छ। अमेरिकी बजारको सुधार, जापानी कम्पनीहरूको सशक्त आर्थिक नतिजा तथा सकारात्मक अन्तर्राष्ट्रिय माहोलले बजारमा थप ऊर्जा भरेको एजेन्सीहरूले उल्लेख गरेको छ।
टोकियोको प्रमुख सूचकांक निक्केई225 आज ८९७.६९ अंक (२.१५ प्रतिशत) ले बढेर ४२ हजार ७१८.१७ मा पुग्यो। यो स्तर पछिल्ला १३ महिनामै सबैभन्दा उच्च हो।
निक्केई २२५ भनेको टोकियो स्टक विनिमयमा सूचीकृत २२५ ठूला तथा प्रभावशाली कम्पनीहरूको सेयर मूल्यको औसतका आधारमा गणना गरिने जापानको प्रमुख बजार सूचक हो। यसलाई जापानी आर्थिक समाचार संस्था निहोन केइजाई शिम्बुन प्रकाशित तथा व्यवस्थापन गर्छ, जसले देशको समग्र आर्थिक स्वास्थ्यको महत्वपूर्ण संकेतकको रूपमा काम गर्छ।
बजारको सकारात्मक धारणा निर्माणमा अमेरिकी महसुल छुटको पुष्टि, ठोस कर्पोरेट नतिजा र विदेशी छोटो अवधिका लगानीकर्ताको सक्रियताले प्रमुख भूमिका खेलेका छन्। यसका साथै, डलरसँगको तुलनामा येनको विनिमय दर करिब १४८ मा झरेकाले निर्यातमुखी कम्पनीहरूको सेयर मूल्यमा विशेष सुधार आएको छ।
टोकियो स्टक एक्सचेन्जको टोपिक्स सूचकांक पनि ४२.१६ अंक (१.३९ प्रतिशत) ले बढेर ३,०६६.३७ मा बन्द भयो, जुन लगातार दोस्रो दिनको कीर्तिमानी बन्द हो।
आजको कारोबारमा प्राइम बजारका ९६४ कम्पनीका सेयर बढे, ६०० कम्पनीका सेयर घटे र ५९ कम्पनीका सेयर स्थिर रहे।
प्रतिक्रिया दिनुहोस !
