बुटवल : झिमरुक गाउँपालिका–१ वडाचौर प्यूठानका शंकर पोख्रेल वडासदस्य हुन् । दिउँसोभर जनताको काममा व्यस्त हुन्छन् । वडा कार्यालयदेखि गाउँपालिका कार्यालयसम्म आउजाउ गर्दा समय बित्छ । नागरिकका पीडा बुझ्न घरघरै पुग्छन् । उनको वडा छिमेकी जिल्ला गुल्मी र अर्घाखाँचीसँग जोडिएको वडा हो ।
बिहान, बेलुकाबाहेकको समय पोख्रेललाई बारीमा लगाएका ड्रागनको हेरचाह गर्न भ्याइनभ्याइ हुन्छ । अहिले बारीमा चार सय ड्र्यागनका बोटहरू छन् । २०७८ सालको कोरोनामा भएको लकडाउनको बेला सुरु गरेको उनको यो व्यावसायिक खेतीले अहिले फराकिलो बाटो समाएको छ ।
यसैमा उनले देख्नुसम्मको भविष्य देखेका छन् ।
‘गर्न सके गाउँमै राम्रो सम्भावना हुँदो रहेछ’, पोख्रेल भन्छन्, ‘हाम्रो गाउँ १ हजार ४ सय मिटर उचाइमा छ । गाउँमै ड्र्यागन खेती गर्ने म पहिलो व्यक्ति हुँ । हुँदैन कि भन्ने डर थियो । गर्दै जाँदा राम्रो नतिजा आयो ।’ उनी यो खेतीलाई यत्तिकैमा राख्ने सोंचमा छैनन् । यसै वर्ष चार हजार बिरुवा थप्ने योजना बनाएका छन् । प्यूठानकै सरुमारानी गाउँपालिकाको दरभानबाट बिरुवा लिएर उनले गाउँमा ड्र्यागन खेती थालेका हुन् । उनकी श्रीमती माया पन्थी
गाउँकै बालुवा अम्मर प्राविकी प्रधानाध्यापक हुन् ।
श्रीमती स्थायी शिक्षक आफू जनप्रतिनिधि भएकाले दिउँसोभर काम गर्न समयले त्यति साथ दि“दैन् । तर, बिहान र बेलुकाको समय उनीहरूलाई ड्र्यागनका बिरुवाहरूको हेरचाह गर्न भ्याइनभ्याइ हुन्छ । बिहान, बेलुकाको कामले पनि राम्रै प्रतिफल दिएको पोख्रेलले सुनाए । ड्र्यागन नलगाउँदा हलेँदो र अदुवा खेती गरेको बताउँदै उनले अहिले यसैबाट लाखौं आम्दानी गर्न सकिएको समेत अनुभव बताए । ‘सुरुमा तीन लाख रुपैयाँको लगानीबाट खेती सुरु गरेको हुँ’,उनी भन्छन्, ‘यसैवर्ष मात्र तीन लाख रुपैयाँ जति आम्दानी भयो ।’
अदुवा र हलेँदो खेती गरेर पनि पोख्रेल दम्पतीले वार्षिक एक/डेढ लाख रुपैयाँ आम्दानी गर्दै आइरहेका थिए । तर, त्यसले भन्दा ड्र्यागनले उनीहरूलाई सोँचेभन्दा पनि राम्रो प्रतिफल दिइरहेको छ ।
४० वर्षीय पोख्रेलको यो सफलताले गाउँका अरू युवाहरूलाई हौसला दिएको छ । मेहनत गर्नसके गाउँमै राम्रो सम्भावना छ भन्ने कुराको उनी उदाहरणीय पात्र बनेका छन् । रातो सी भेराइटीको ड्र्यागन उत्पादन हुनमात्र पर्छ, बजारको समस्या पर्दैन ।
जिल्लाको प्रमुख बजार बाग्दुला, छिमेकी जिल्ला गुल्मीको पुर्कोटदह, अर्घाखाँची सन्धिखर्कसहित बुटवलमा बिक्रीका लागि पठाउँछन् । गाउँबाटै ती सहरमा गाडी जान्छन् । ड्र्यागन फूलेको करिब ४० दिनमा खान तयार हुने पोख्रेलले बताए । प्रतिकिलो ३ सय ५० रुपैयाँमा उनले बिक्री गर्छन् ।
प्रतिक्रिया दिनुहोस !
