काठमाडौं : म्यानमारको राखिन राज्यको मराउक यू नगरमा हवाइ आक्रमण हुँदा कम्तीमा १२ जनाले मृत्यु भएको छ। स्थानीयका अनुसार आक्रमण राति करिब ११ बजेतिर भएको हो।
राखिन राज्य लामो समयदेखि द्वन्द्वग्रस्त रहँदै आएको छ। सेनाले विद्रोही समूहहरूसँग संघर्ष गरिरहेको अवस्थामा सन् २०२३ मा निर्वाचित सरकारलाई हटाएर सेनाले सत्ता कब्जा गरेपछि द्वन्द्व अझ चर्किएको हो।
स्थानीय माउङ थान चायले आक्रमणमा आफ्ना तीन नातिनातिनी गुमाउनुपरेको बताए। 'यो मेरो जीवनको सबैभन्दा ठूलो पीडा हो। खानेकुरा छैन, बस्ने ठाउँ छैन, भाँडा छैन, पैसा छैन, सबै कुरा नष्ट भयो,' उनले भनेका छन्।
मंगलबार बिहान कम्तीमा १० वटा शवहरूलाई अन्तिम श्रद्धाञ्जलिका लागि राखिएको दृश्य अत्यन्तै मार्मिक थियो। कतिपय मृतकलाई उनीहरूले मन पराएका पोशाकमा सजाइएको थियो। आफन्तजनले आँसु पुछ्दै, तस्बिर अँगाल्दै अन्तिम बिदाइ गरेका थिए।
राखिन राज्यका १७ नगरमध्ये सेनाको नियन्त्रणमा हालः ३ मात्र रहेका छन्। सेनाले यही वर्ष नोभेम्बर १२ देखि चरणबद्ध निर्वाचन गर्ने योजना घोषणा गरेको छ। तर, विद्रोही समूह अराकान सेनाले आफ्नो प्रभाव क्षेत्रमा चुनाव हुन नदिने स्पष्ट गरेको छ। अराकान सेनाका प्रवक्ता खाइङ थु खाले आक्रमणमा पाँच बालबालिकासहित १२ जनाको मृत्यु भएको र २० जना घाइते भएको जानकारी दिएका छन्।
प्रतिक्रिया दिनुहोस !
