राप्ती स्वास्थ्य विज्ञान प्रतिष्ठानको उपकुलपति नियुक्ति रोक्न अन्तरिम आदेश

 दाङ : राप्ती स्वास्थ्य विज्ञान प्रतिष्ठान दाङको उपकुलपति नियुक्ति गर्न मंसिर २५ गते स्वास्थ्य मन्त्रालयले जारी गरेको सूचनालाई रोक्न उच्च अदालत तुलसीपुरले अन्तरिम आदेश दिएको छ । यस पहिले नै दिइसकेको आदेशलाई उच्च अदालत तुल्सीपुरले मङ्गलबारको दुईपक्षीय छलफलबाट निरन्तरता दिएको हो। 

उच्च अदालतका न्यायधिशद्वय दुर्गा बहादुर विश्वकर्मा र यज्ञबहादुर राना मगरको संयुक्त इजलासले अन्तरिम आदेशलाई निरन्तरता दिएको हो । अदालतका सूचना अधिकारी कृष्णप्रसाद शर्माले प्रतिष्ठानका निमित्त अस्पताल निर्देशक जनार्दन पन्थीले दायर गरेको रिटमा पुस ८ गते छलफलमा दुबै पक्षलाई बोलाएपछिको बहसमा अन्तरिम आदेशलाई निरन्तरता दिएको जानकारी दिए । 

यसअघि अल्पकालिन अन्तरिम आदेश उच्च अदालतका मुख्य न्यायाधीश राजेश्वर तिवारीको एकल इजलासले दिएको थियो ।उच्च अदालतको अन्तरिम आदेशको निरन्तरतापछि उपकुलपति नियुक्ति प्रक्रिया  हाललाई रोकिन पुगेको छ । प्रतिष्ठानका उपकुलपति डा. विकास लामिछानेले राजीनामा दिएपछि ३ महिनादेखि प्रतिष्ठान उपकुलपतिविहीन छ।