राष्ट्रिय सभा निर्वाचन
लुम्बिनी प्रदेशमा कांग्रेस-एमालेबाट संयुक्त उम्मेदवारी
पुष २३, २०८२ बुधबार १६:१५:८
दाङ : राष्ट्रिय सभा निर्वाचनका लागि लुम्बिनी प्रदेशमा नेपाली कांग्रेस-नेकपा एमालेबाट संयुक्त तीनजनाको उम्मेदवारी परेको छ । नेपाली कांग्रेस र नेकपा एमालेको राष्ट्रिय सभा निर्वाचनमा सहकार्य गर्ने सहमति अनुसार कांग्रेसबाट चन्द्रबहादुर केसी,बासुदेव घिमिरे ‘जंगली’ र एमालेबाट रामकुमारी झाक्रीको उम्मेदवारी परेको हो ।
आगामी माघ ११ गते हुने राष्ट्रियसभा सदस्य निर्वाचनका लागि दाङको लमही नगरपालिका-२ निवासी घिमिरेले अपाङ्ग, केसीले अन्य र झाक्रीले महिला कोटामा उम्मेदवारी दर्ता गराएका हुन् । घिमिरेको प्रस्तावमा दाङको बबई गाउँपालिका अध्यक्ष कुलबहादुर खत्री क्षेत्री र समर्थकमा बङ्गलाचुली गाउँपालिका उपाध्यक्ष भक्त जिसी रहेका छन् ।
गुल्मी रेसुङ्गा नगरपालिका-३ निवासी केसीको प्रस्तावकमा दङ्गीशरण गाउँपालिका अध्यक्ष शम्भु गिरी र समर्थकमा शान्तिनगर गाउँपालिका अध्यक्ष प्रमोद बस्नेत,झाँक्रीको प्रस्तावकमा घोराही उपमहानगरपालिका प्रमुख नरुलाल चौधरी र समर्थकमा घोराहीकै उपप्रमुख हुमा कुमारी डिसी रहेका छन् । उम्मेदवारी दर्ताका लागि कांग्रेस-एमालेका संयुक्त उम्मेदवारहरू र्यालीसहित निर्वाचन अधिकृतको कार्यालय पुगेका थिए । नेकपाका उम्मेदवार भने मनोनयनको तयारीमा छन्।
प्रतिक्रिया दिनुहोस !
