अछाममा कांग्रेसले टुंग्यायो उम्मेदवार ,भरतकुमार स्वाँर र पुष्पबहादुर शाहले पाए टिकट

अछाम : नेपाली कांग्रेसले उम्मेदवारको टुंगो लगाएको छ । अछाम क्षेत्र नं १ मा पूर्व जिल्ला पार्टी सभापति भरतकुमार स्वाँर र क्षेत्र नं २ जिल्ला पार्टी सभापति पुष्पबहादुर शाह उम्मेदवार बन्ने भएका छन् । 

पहिले दुबैजना देउवा पक्षका भए पनि विशेष महाधिवेशनमा स्वाँर गगन थापा र शाह देउवा पक्षमा थिए।

स्वाँर दोस्रो पटक र शाह तेस्रो पटक उम्मेदवार बन्दैछन् । स्वाँर २०७४ मा तत्कालीन नेकपा एमालेका उम्मेदवार भीमबहादुर रावलसँग पराजित भएका थिए । रावलले २४ हजार ८९३ मत पाएका थिए भने कांग्रेसका भरतकुमार स्वाँरले १७ हजार ६८९ मत प्राप्त गरेका थिए । 

क्षेत्र नं २ मा २०७९ को निर्वाचनमा निर्वाचित भएका शाह फेरि उम्मेदवार बन्ने भएका छन् । पुराना प्रतिस्पर्धीहरू फेरि आमने सामने हुने भएका छन् । २०७९ को निर्वाचनमा शाहसँग एमालेका उम्मेदवार यज्ञबहादुर बोगटी ४ हजार ४७१ मतान्तरले पराजित भएका थिए । शाहले १७ हजार २८३ मत पाएका थिए भने बोगटीले १२ हजार ५१२ मत प्राप्त गरेका थिए ।

यस्तै २०७४ को निर्वाचनमा भने बोगटीसँग शाह २ हजार ८५९ मतान्तर पराजित भएका थिए । बोगटीले २१ हजार ९६५ र शाहले १९ हजार १०६ मत प्राप्त गरेका थिए । यी दुई अनुहारबीच फेरी फागुन २१ को निर्वाचनमा कडा प्रतिष्पर्धा हुने देखिन्छ।