हेटौंडा : हेटौंडा सामुदायिक आँखा अस्पतालले गरेको निःशुल्क आँखा शिविरमा १ हजारभन्दा बढीले आँखा जाँच गरेका छन्।
रोटरी क्लब मिडटाउन काठमाडौं, रोटरी क्लब हेटौंडा र सामुदायिक आँखा अस्पतालको संयुक्त आयोजनामा ४ जिल्लामा भएको शिविरमा १ हजार १ सय ३३ जनाले आँखा जाँच गरेको अस्पतालका वरिष्ठ लेखा तथा वित्त अधिकृत उमेश महतले बताए।
गत माघ ३ गतेबाट अस्पतालले बारा, पर्सा, रौतहट र मकवानपुर जिल्लाका विभिन्न क्षेत्रमा गरेको शिविरको क्रममा १ सय ८४ जनामा मोतियाबिन्दु भेटिएको उनले बताए। उनका अनुसार आँखा शिविरमा मोतियाबिन्दु देखिएकामध्ये ८५ जनाको निःशुल्क शल्यक्रिया गरिएको छ।
शिविरको क्रममा कलैया उपमहानगरपालिकामा १ सय ७० जनाले आँखा जाँच गरेकोमा १९ जनामा मोतियाबिन्दु भेटिएको थियो। यस्तै, बारागढी गाउँपालिकामा २ सय ४५ जनाले आँखा जाँच गरेकोमा ६२ जनामा मोतियाबिन्दु भेटिएको थियो। यस्तै, सिमरा नगरपालिकामा १ सय ४२ जनामध्ये १८ जनामा मोतियाबिन्दुको समस्या भेटिएको थियो।
यस्तै, मकवानपुरको हाडिखोलामा २ सय १० जनामा गरिएको आँखा जाँचको क्रममा १८ जनामा मोतियाबिन्दु भेटिएको महतले बताए। यस्तै, पर्सा जिल्लामा १ सय ४४ जनामा गरिएको आँखा जाँचका क्रममा ३० जना र रौतहटमा २ सय २२ जनामध्ये ३७ जनामा मोतियाबिन्दुको समस्या भेटिएको थियो।
मोतियाबिन्दु भएकाहरूलाई अस्पतालका डा. सुनिल थकाली, डा. माहिनी श्रेष्ठ र डा. बन्दना अधिकारीले आँखाको शल्यक्रिया गरेका थिए। मोतियाबिन्दु भएर शल्यक्रिया गरेकाहरूको शुक्रबार बिहान आँखाको पट्टी खोलिएको छ।
प्रतिक्रिया दिनुहोस !
