गोरखा : गोरखामा भारी हिमपात भएको छ । बिहान तीन बजेतिरबाट चुमनुब्री गाउँपालिका वडा नं. १ को साम्दो, सामागाउँ, वडा नं. २ को ल्हो, स्याला, वडा नं ६ को चुम्चेत, वडा नं. ७ को नौवटै गाउँबस्तीमा हिमपात भएको स्थानीयबासीको भनाइ छ ।
‘बिहान तीन बजेदेखि हिउँ पर्न सुरु गरेको हो’, चुमनुब्री ७ का पासाङफुञ्जो लामाले भने, ‘हिउँ परेपछि गाउँलेहरू एकदम खुशी भएका छन् ।’ खेतीपानी राम्रो हुने, धुलो नउड्ने, हुरीबतास नचल्ने र आगलागीको डर नहुने भन्दै स्थानीय खुशी भएका उनको भनाइ छ ।
‘सँधै हुरी बतास चलेर अहिले त घरको अँगेनामा आगो फुक्न पनि नसक्ने अवस्था थियोअ’, उनले भने, ‘अब त बल्ला हिउँ पर्यो । आगालागीको पनि डर हट्यो । हावाहुरी चलेर धुलो उडाएर बस्न नसक्ने भएको थियो । त्यस्तो पनि नहुने भयो अनि मंसिरमा लगाएको गहुँ खेतीले पनि पानी पाउने भयो । वनको झारलहरुले पनि पानी खान नपाएर आत्ति सकेका थिए । अब पानी खान पाउने भयो ।’
अहिलेसम्म करिब एकफिट हिउँ परेको उनले बताए । हिमपात भएपछि गाउँलेहरुको दिनचर्यामा पनि परिवर्तन भएको छ । अहिले सबै जना घरभित्रै आगो तापेर बसेका उनको भनाइ छ ।
प्रतिक्रिया दिनुहोस !
