झापा : नेकपा एमालेका अध्यक्ष केपी शर्मा ओलीले एक कार्यकाल पूरा गर्न चार पटक प्रधानमन्त्री बन्नु परेको टिप्पणी गरेका छन् । झापा–५ को चुनावी अभियानका क्रममा घरदैलोमा रहेका ओलीले मतदातासँगको संवादमा आफ्नो राम्रो काम थालेपछि सरकार ढालिएको दावी गरेका छन् ।
उनले भने, ‘विकासको काम ठ्याक्क उभिएर हुँदैन । पाइला सार्नुपर्छ । मैले रेल फेरि सुरु किन गर्न खोजें ? किन पानीजहाजको बाटोबाट सम्बन्ध जोड्ने भनें ? त्यसका निम्ति काम हुँदै थियो, मैले सुरु गर्छु, फेरि सरकार भत्काउँछन् । फेरि सुरु गर्छु, फेरि भत्काउँछन् । एक कार्यकाल पूरा गर्न चार पल्ट प्रधानमन्त्री हुनुपर्यो ।’
उनले विरोधीहरूले देशभक्ति र राम्रो काम गरेको नसहेको तर्क गरेका छन् । उनले भने, ‘अलिकति काम गरेपछि सहनै सक्दैनन्, भत्काइहाल्छन् । देशभक्तिको काम गर्नै दिँदैनन् । देशको हितमा, देश विकास गर्ने काम गर्नै दिँदैनन् । यहाँ औद्योगिक क्षेत्र बनाउन नदिने भनेर देशभित्र देश बाहिरका अनेक शक्तिहरू लागेका छन् ।’
उनले आफूले विभिन्न शास्त्रका, इतिहासका कुरा गर्दा उखान टुक्का भन्दै उडाइने गरेको गुनासो गरेका छन् । उनले भने, ‘हामीले काम गर्न छोड्नु हुँदैन । सभागृह आवश्यक हुँदैन ? संसारभरि सबै शहरमा, सबै नगरमा सभागृह हुन्छन् । सामुदायिक भवनहरू हुन्छन्, रङ्गशालाहरू हुन्छन् । रङ्गशाला पनि चाहिँदैन भन्ने, भ्युटावर चाहिंदैन भन्छन् । यो वास्तवमा भ्युटावर होइन, यो एउटा बिजनेस कम्प्लेक्स हो । यसमा आइटी आदि इत्यादिको नयाँ खालको इन्भेस्टमेन्ट हो । आइटी इन्डस्ट्री, आइटी हबको रूपमा यसलाई विकास गर्ने सोचका साथ अगाडि बढाएको हो ।’
प्रतिक्रिया दिनुहोस !
