चार नयाँ टावर निर्माण, पाँच वटामा विद्युतीकरण

दाङ : दूरसञ्चार कार्यालय तुलसीपुर (नेपाल टेलिकम कार्यालय) दाङले आफनो सेवा क्षेत्रमा सेवा सुधारको प्रयास गरेको छ । सेवा विस्तार र गुणस्तर सुधार गर्ने उद्देश्यले नेपाल टेलिकमले दाङ र प्युठान जिल्लाका विभिन्न स्थानमा नयाँ टावर निर्माण गरेको जनाएको छ । ग्रामीण भेगमा नेटवर्क पहुँच विस्तार र नयाँ टावर सञ्चालनमा आएपछि दुर्गम बस्तीमा मोबाइल र डाटा सेवाको पहुँचमा सहजता आएको छ ।  

जिल्लाका दुर्गम र सेवामा समस्या भइरहेका स्थानमा चार नयाँ टावर निर्माण गरेको हो भने सोलार प्रणालीबाट सञ्चालन हुँदै आएका रोल्पा, रुकुम र प्युठानका ५ वटा टावरमा स्थानीय प्रसारण लाइनको विद्युत् जडान गरी विद्युतीकरण विस्तार गरिएको छ । थप केहि तयारी अवस्थामा छन् । 

टेलिकम दाङ कार्यालयका अनुसार तुलसीपुर उपमहानगरपालिका–१, पवननगर,  गढवा गाउँपालिका–३ गोवहिया, दंगीशरण गाउँपालिका–१, फुर्केसल्ली र प्युठानको मल्लरानी गाउँपालिकामा नयाँ टावर निर्माण गरिएको हो । यसबाट सेवा समेत सुरु भइसकेको छ । यी क्षेत्रहरुमा नयाँ टावर निर्माण हुँदा ८ सय घरधुरीलाई प्रत्यक्ष लाभ भएको र फोरजीलगायत आधुनिक सेवा सञ्चालनमा आएको कार्यालय प्रमुख बरिष्ठ इन्जिनियर प्रविणकुमार चौधरीले बताए । स्थानीयको माग र आवश्यकताका आधारमा सेवा विस्तार गरिएको र त्यसको राम्रो प्रभाव स्थानीयस्तरमा देखिएको उनले बताए । 

दाङको फुर्केसल्ली क्षेत्रमा टावर निर्माण हुँदा त्यसले बबई गाउँपालिकाको दुर्गम क्षेत्र मलइ, जलजलालगायतका क्षेत्र टेलिकमको सेवा सुरु भएको छ । यसअघि यो क्षेत्रमा नेपाल टेलिकमको सेवा प्रभावकारी थिएन । स्थानीय राम पुनले फोनको नयाँ टावर बनेपछि केहि दिनदेखि राम्रोसँग कुराकानी गर्न सकिएको बताए । ‘पहिले फोन नै टिप्दैनथ्यो’, उनले भने, ‘अहिले इन्टरनेट समेत राम्रोसँग चल्न थालेको छ ।’ त्यसै गरी गोवडिया क्षेत्रमा पनि फोन सेवा राम्रो थिएन, अहिले राम्रो भएको कार्यालयले बताएको छ । कार्यालय अन्तर्गत ४ जिल्लामा करिव २ सय टावरहरु सञ्चालनमा रहेका छन् । 

सोलारबाट विद्युतीकरणमा ५ टावर 
रोल्पा, पुर्वी रुकुम र प्युठानका विभिन्न पाँच क्षेत्रमा सञ्चालित टावरहरूमा विद्युतिकरण गरिएको छ । लामो समयदेखि सोलार प्रणालीको भरमा सञ्चालन हुँदै आएका ती टावरहरुमा विद्युतीकरण गरिएको हो । रुकुम पूर्वको जांङ टावर, रोल्पाको गंगादेव, रोल्पाको मिरुल, रोल्पाको पाङ र प्युठानको स्याउलीवाङ टावरमा विद्युतीकरण गरिएको छ । 

स्थानीय विद्युत उत्पादन कम्पनीसँगको सहकार्यमा टावरमा विद्युतीकरण गरिएको कार्यालयले बताएको छ । टावरमा विद्युत पुग्दा सेवा २४ सै घण्टा सुरु भएको प्रमुख चौधरीले जानकारी दिए । ‘घाम नलाग्ने मौसममा ब्याट्री चार्ज हुन नसक्दा नेटवर्क अवरुद्ध हुने, कल ड्रप बढ्ने र इन्टरनेट सेवा कमजोर हुने समस्या देखिँदै आएको थियो’, कार्यालय प्रमुख चौधरीले भने, ‘विद्युतीकरण भएपछि यो समस्या शून्यमा झरेको छ । विद्युतीकरण गरिएका टावरमा ‘हाइब्रिड प्रणाली’ लागू भएको छ ।’ 

टेलिकमले सोलारबाट चलिरहेका टावरमा विद्युत लाइन जडानसंगै सोलार सिस्टम पनि प्रयोग यथावत हुँदा ‘हाइब्रिड प्रणाली’ लागू भएको प्रमुख चौधरीले बताए । अब ती टावरहरू सोलार र विद्युत लाइन दुवै स्रोतबाट सञ्चालन हुनेछन् । यसले वर्षायाम र हिउँदमा हुने नेटवर्क अवरोध न्यूनीकरण हुने विश्वास गरिएको छ । 
 

सोलार मात्रै हुदा विहान ६ बजेदेखि राति १०-११ बजेसम्म मात्रै हुने नेटवर्क सेवा अब २४ सै घण्टा हुनेछ । पहिले सोलार मात्रै हुँदा लामो समय घाम नलाग्दा सेवा अवरुद्ध हुने अवस्था रहँदै आएको थियो । ‘अब विद्युत् जडान भएपछि सेवा स्थिर र भरपर्दो हुने अपेक्षा गरेका छौँ’, प्रमुख चौधरीले भने, ‘यसले उपभोक्ताहरुलाई सेवामा गुणस्तर र सहज बनाएको छ ।’ 

रोल्पा र पूर्वी रुकुमका स्थानीयवासीले टावर विद्युतीकरणपछि नेटवर्क स्थिर हुने आशा व्यक्त गरेका छन् । इन्टरनेट समेत भरपर्दाे हुने उनीहरूको भनाइ छ । टेलिकमले आगामी दिनमा थप दुर्गम क्षेत्रमा पूर्वाधार विस्तार गर्ने र सेवा गुणस्तर सुधारलाई प्राथमिकतामा राख्ने जनाएको छ । अझै ३० वटा टेलिकम टावर सोलारबाट सञ्चालन रहेका छन् । यी सबैमा विद्युतीकरण गर्न पहल भइरहेको कार्यालयले जनाएको छ ।