स्याङ्जा : प्रेस काउन्सिल नेपालको आयोजना र नेपाल पत्रकार महासंघ स्याङ्जाको संयोजनमा निर्वाचन आचारसंहिता र मिडिया अनुगमन विषयक अन्तरक्रिया गरिएको छ ।
प्रेस काउन्सिल नेपालका बोर्ड सदस्य केशवशरण लामिछानेले निर्वाचनका बेला पत्रकार तथा सञ्चार माध्यमले पालना गर्नुपर्ने आचारसंहिताका बारेमा जानकारी गराए । लामिछानेले छापा, अनलाइन, रेडियो, टेलिभिजन जस्ता सञ्चारमाध्यमले तोकिए बमोजिमका आचारसंहिताको पालना गर्दै प्रशारण र प्रकाशन गर्नुपर्ने बताए ।
सदस्य लामिछानेले आचारसंहिता र मिडिया अनुगमनसहित राष्ट्रिय तथा अन्र्तराष्ट्रिय क्षेत्रमा भए गरेका काम तथा नियमनका बारेमा कार्यपत्र प्रस्तुत गरेका थिए । मुख्य निर्वाचन अधिकृत उपेन्द्र गौतमले निष्पक्ष र भयरहित तरिकाबाट निर्वाचन सम्पन्न गर्न पत्रकार जगतले सहयोग गर्नुपर्ने बताए । मतदाता शिक्षादेखि उम्मेदवारका निर्वाचन आचारसंहिताको विषयमा सचेत गराउने काममा समेत पत्रकारको भूमिका महत्वपूर्ण रहने मुख्य निर्वाचन अधिकृत गौतमको भनाई थियो ।
कार्यक्रममा प्रमुख जिल्ला अधिकारी इश्वरीप्रसाद अर्यालले मतदाता, उम्मेदवार, राजनीतिक दल, सुरक्षाकर्मी, कर्मचारीलगायत सबैले आ–आफ्ना आचारसंहिताको पालना गर्नुपर्नेमा जोड दिए । पत्रकार महासंघ स्याङ्जाका अध्यक्ष प्रदिप कोइरालाले यहाँका पत्रकारबाट आचारसंहिता उल्लंघन नगरेको जनाएका छन् । कार्यक्रम प्रेस काउन्सिलका सदस्य एवं गण्डकी प्रदेश संयोजक भीमलाल श्रेष्ठको अध्यक्षतामा सम्पन्न कार्यक्रममा काउन्सिलका सदस्य विजयराज अधिकारीले स्वागत र पत्रकार महासंघका सचिव सुशील सुवेदीले सञ्चालन गरेका थिए ।
प्रतिक्रिया दिनुहोस !
