कष्टकर पर्खाइपछि वेस्ट इण्डिजले व्यवसायिक उडानमार्फत स्वदेश फर्काउँदै खेलाडी

काठमाडौं : टी–२० विश्वकप २०२६ खेल्न भारतमा रहेको वेस्ट इण्डिजले आफ्नो खेलाडीलाई व्यवसायिक उडानमार्फत स्वदेश फर्काउने भएको छ ।  मध्य पूर्वमा चलिरहेको तनावको अवस्थाका कारण मार्च १ मा विश्वकपबाट बाहिरिएको वेस्ट इण्डिज कोलकातामा अड्किरहेको थियो ।

जसका कारण खेलाडी तथा अफिसियलहरु स्वदेश फर्कन ढिलाइ भएको थियो । विशेषतः दक्षिण अफ्रिका र वेस्ट इण्डिजको टिम यो समस्याका कारण भारतमा नै अड्किएको हो । बारम्बार आइसीसीले चार्टर विमानको व्यवस्थासहित उनीहरुलाई स्वदेश फर्काउने कोशिस गर्दा पनि अस्तव्यस्त रहेको मध्य पूर्वको एयरपोर्टहरुका कारण खेलाडीहरु भारतमा नै अड्किएका हुन् ।

लामो समय भारतमा नै अड्किएपछि खेलाडी तथा अफिसियलले आफूहरु घर (स्वदेश) फर्कन चाहेको इच्छा व्यक्त गरेका थिए । लामो समयको पर्खाइपछि पनि आइसीसीबाट निश्चितता नआएपछि क्रिकेट वेस्ट इण्डिज (सीडब्ल्यूआई) ले खेलाडी तथा अफिसियललाई व्यवसायिक उडानमार्फत घर फर्काउन लागेको हो ।

वेस्ट इण्डिजका केही खेलाडीहरु भने घर फर्किइसकेका छन् भने कोही मंगलबार र बुधबार गरेर घर फर्किने तयारीमा रहेका छन् । दक्षिण अफ्रिका र वेस्ट इन्डिजका खेलाडीले आइसीसीले यो समस्या समयमा समाधान गर्न नसकेको भन्दै आलोचना समेत गरेका थिए । जहाँ, सेमिफाइनलमा भारतसँग पराजित भएको इङ्ल्याण्ड भने खेल सकिएको भोलिपल्ट नै स्वदेश फर्किसकेको छ ।

यस विषयमा आइसीसीले पक्षपात गरेको भन्ने धारणाहरु पनि बाहिरिएको थियो । इङ्ल्याण्डलाई सहजै स्वदेश फर्काउन आइसीसीले राम्रो व्यवस्था गरेको तर वेस्ट इण्डिज र दक्षिण अफ्रिका भने लामो समय भारतमा नै अड्किनु पर्दा यो विषयको उडान भएको थियो ।