काठमाडौं : राहदानी विभागले राहदानी वितरण एकदेखि तीन सातासम्म बन्द हुन सक्ने बताएको छ । नयाँ प्रणालीबाट राहदानी जारी गर्दा वितरण केही समय अवरूद्ध हुनसक्ने विभागले सूचना जारी गरी जनाएको छ ।
अहिले राहदानी पुस्तिका लगायतका आवश्यक तयारी गरिसकेको र एक–दुई महिनाभित्रमा हालको प्रणालीबाट नयाँ प्रणालीमा बदली हुने बताउँदै विभागले उक्त अन्तरिम व्यवस्थामा प्रणाली स्थिर नभएसम्म राहदानी वितरण अवरूद्ध हुने जनाएको हो ।
जिल्ला तथा इलाका प्रशासन र विदेशस्थित नेपाली नियोगबाट प्रदान गरिने राहदानी सेवा एकदेखि तीन हप्तासम्म बन्द हुन सक्ने विभागले जनाएको छ । त्यस्तै राहदानी विभागबाट प्रदान गरिने राहदानी सेवा एक हप्तासम्म बन्द हुन सक्ने बताइएको छ ।
नयाँ प्रणालीमा स्थिरताका लागि एक देखि तीन महिनासम्म लाग्ने पनि विभागले जनाएको छ । त्यसो हुँदा अन्तरिम अवधिमा जिल्ला÷ इलाका प्रशासन कार्यालय तथा विदेशस्थित नेपाली नियोगबाट आवेदन दिँदा राहदानी तयार भएर जारी हुन अहिलेको भन्दा बढी समय लाग्न विभागले जानकारी गराएको छ ।
त्यसकारण असोजभित्र राहदानी आवश्यक पर्न सक्ने सेवाग्राहीले अन्तरिम अवस्था सुरू हुनु अघि नै सम्बन्धित जिल्ला -इलाका प्रशासन कार्यालय वा विदेशस्थित नेपाली नियोग वा राहदानी विभागबाट राहदानी सेवा लिन आग्रह गरेका छन् । नयाँ प्रणाली शुरु हुने मिति तथा उक्त अवधिमा गरिने व्यवस्थाका सम्बन्धमा अर्को सूचना मार्फत जानकारी गराइने समेत जनाइएको छ ।
प्रतिक्रिया दिनुहोस !
