तानसेन : गत वर्षको वर्षातमा पहिरोबाट विस्तापित तिनाउ गाउँपालिका–४ बौरीडाँडाका ६ घरपरिवारले नयाँ घर पाएका छन् । पहिरोका कारण गत बर्षातदेखि घरबारविहीन भएका ६ घर परिवारलाई तिनाउँ गाउँपालिका पाल्पाले प्रदेश र केन्द्र सरकारको सहयोगमा नयाँ घर निर्माण गरिदिएको हो ।
गत बर्षको मनसुनमा पहिरोले घर बस्नै नमिल्ने भएपछि पविसरा आलेसहित हुमबहादुर गाहा, तुलबहादुर गाहा, यामबहादुर दर्लामी, यानीसरा गाहा र कोपिला सरा रानाका परिवार घरबारविहीन बनेका थिए । ‘वर्षायाम सुरु हुन लाग्दा गाउँपालिका बाट नयाँ घर पाएका छौं, अब ढुक्कले आफ्नै घरमा बस्न पाइयो, नयाँ घर पाउदा खुशी लागेको छ’ पविसरा आलेले भनिन् ।
सुरक्षित घर निर्माणको लागी संघीय सरकार, लुम्बिनी प्रदेश सरकार र तिनाउ गाउँपालिकाको लागत साझेदारीमा प्रति परिवार ४ लाख रुपैयाँ अनुदान उपलब्ध गराइएको थियो । जोखिममा परेका घरपरिवारले घर निर्माणमा लाखौ रुपैयाको जनश्रमदान गरेका छन् ।
जिल्ला विपद व्यवस्थापन कोषको मापदण्ड अनुसार प्राप्त उक्त रकम बाहेकको अतिरिक्त खर्च र श्रमदानमा घरधनी आफैँ जुटेका थिए। लाभग्राही तुलबहादुर गाहाले सरकारले आफूहरुलाई घर बनाउन सहयोग गर्दै केही रकम उपलब्ध गराएको बताए । सरकारी सहयोगमा आधा रकम आफूहरुले थपेर घर बनाउन सफल भएको पहिरो पीडित तुलबहादुर गाँहाले बताए ।
गाउँपालिकाले आवास निर्माणका लागि लाभग्राही छनौट गर्दा प्रहरी मुचुल्का, वडाको सिफारिस र वास्तविक विपन्नतालाई आधार बनाएर सहयोग गरेको छ । स्थानीय सरकार नागरिकको सुख–दुःखको घर दैलोको सरकार भएको तिनाउँ गाउँपालिकाका कोही पनि नागरिक घरवासविहीन भएर बस्न नपरोस् भनेर पालिकाले सुरक्षित आवास अभियान शुरु गरेको गाउँपालिका अध्यक्ष प्रेम श्रेष्ठले बताए । पालिकाले वडा नं. ४ को बौरीडाँडाको यो कार्य त सुरुवात गरेको र आगामी दिनमा अन्य वडामा आवास विहीनहरुलाई सुरक्षित घरवासमा जोड्ने अध्यक्ष श्रेष्ठले बताए ।
वडा नं. ४ का ६ घर परिवारमा सुरक्षित आवास हस्तानतरमा सहभागी पालिका उपाध्यक्ष लालबहादुर दर्लामीले यस वर्ष पनि थप ३ अति विपन्न परिवारको आवास निर्माणका लागि सिफारिस भइसकेको बताए । पालिकामा कोही पनि घरवासविहीन भएर बस्न नपरोस् भनी संघ, प्रदेश र पालिकाको लागत साझेदारीमा सुरक्षित आवास कार्यक्रम लागु गरेको उपाध्यक्ष थापाले बताए ।
स्थानीय सरकारले स्थानीयस्तरको समस्याको पहिचान गरी समाधान गर्न सहजीकरण गर्ने, प्रदेश र संघिय सरकारले स्थानीय सरकार संग हातेमाले गरी सहकार्य गरेर काम गरेमा संघीयताको प्रभावकारिता जनता माझ पुगेको महसुस हुनेछ । विपदको समयमा सरकारी संयन्त्रहरूबीच कसरी प्रभावकारी समन्वय हुन सक्छ भन्ने उदाहरण बौरीडाँडाले प्रस्तुत गरेको छ । तीन तहका सरकार र नागरिकको सहकार्यले विपद व्यवस्थापनमा कसरी सफलता पाउन सकिन्छ भन्ने यो एउटा अनुकरणीय नमुना बनेको छ ।
प्रतिक्रिया दिनुहोस !
