वीरगन्ज : प्रधानमन्त्री कप पुरुष राष्ट्रिय क्रिकेट प्रतियोगिताअन्तर्गत सुदूरपश्चिमका बलर हेमन्त धामीले कर्णालीविरुद्ध ६ विकेट लिएका छन् । वीरगन्जको नारायणी रंगशालामा जारी खेलमा धामीले कर्णालीविरुद्ध ६ विकेट लिएका हुन्।
टस हारेर ब्याटिङ गर्न आएको कर्णालीले ३२ ओभरमा सबै विकेट गुमाएर ११९ रन मात्र बनाउन सक्यो । कर्णालीलाई सामान्य स्कोरमै रोक्ने क्रममा धामीले सात ओभर बलिङ गर्दै १६ रन खर्चिएर ६ विकेट लिए ।
पहिलो ओभरमै रवीन्द्र शाहीको विकेट लिएर सुखद् सुरुवात दिलाएका धामीले अर्जुन घर्ती, दीपेन्द्र रावत, दिनेश अधिकारी, विपिन रावल, दिवन पुनको विकेट लिएका हुन् । कर्णालीका लागि कप्तान शेर मल्ल, नारायण जोशी, अशोक धामी र मिलन बोहोराले समान १–१ विकेट लिए ।
कर्णालीका विपिन रावलले ३३,सुनिल धमलाले २८ र अरविन्द घर्तीले १३ रन बनाउँदा अन्य ब्याटरले दोहोरो अंकमा रन बनाउन सकेनन् । निर्धारित ५० ओभरको खेलमा १२० रनको लक्ष्य पाएको सुदूरपश्चिमले अहिले पाँच ओभरमा दुई विकेट गुमाउँदै २६ रन बनाएको छ ।
सुदूरपश्चिमका ओपनर राजु रिजाल ७ रन र अभिषेक पाल ६ रन बनाउँदै मैदानबाट बाहिरिसकेका छन् । कर्णालीका बलर अनुज चनराले तीन ओभर बलिङ गर्दै दुई विकेट लिएका छन् । सुदूरपश्चिमका खडक बोहोरा र नरेन भट्ट ब्याटिङ गरिरहेका छन् ।
प्रतिक्रिया दिनुहोस !
