वीरगन्ज : प्रधानमन्त्री कप पुरुष राष्ट्रिय क्रिकेट प्रतियोगितामा कर्णालीले मधेस प्रदेशविरुद्ध ब्याटिङ सुरु गरेको छ। जनकपुरस्थित रामजानकी मैदानमा टस जितेर कर्णालीले ब्याटिङ रोजेको हो ।
खराब सुरुवात गरेको कर्णालीले चार ओभरमा दुई विकेट गुमाएर १५ रन जोडेको छ । कर्णालीका सुनिल धमला एक र अरविन्द घर्ती शून्यमा आउट भएका छन् । मधेसका दुबै सफलता बलर विशाल पटेलले दिलाएका हुन् ।
मधेस अनिल साह र कर्णाली दिवन पुनको कप्तानीमा रहेको छ ।जारी प्रतियोगितामा मधेस प्रदेश अपराजित रहेको छ । अंकतालिकाको शीर्ष ३ मा रहेको मधेसले तीन खेलमा दुई जित हात पारेको छ भने एक खेल नतिजाविहिन भएपछी अंक बाँडेको थियो ।
प्रतियोगिता अन्तर्गतको पहिलो खेल वर्षाका कारण रोकिएपछि कोशीसंग अंक बाँडेको मधेसले दोस्रो खेलमा सुदूरपश्चिममाथि पाँच विकेट र तेस्रो खेलमा लुम्बिनीलाई २५ रनले पराजित गरेको थियो ।
यता तालिकाको छैठौं स्थानमा रहेको कर्णालीको भने तीन अंक छ। कर्णालीले हालसम्म खेलेका तीन खेलमा एक जीत र एक हारको सामना गरेको छ भने एक खेलमा अंक बाँडेको थियो ।
वर्षाका कारण पहिलो खेलमा लुम्बिनीसंग अंक बाँडेको कर्णालीले दोस्रो खेलमा सुदूरपश्चिमसंग चार विकेटको पराजय बेहोरेको थियो । यसैगरी तेस्रो खेलमा कर्णालीले कोशीलाई १६ रनले हराएको थियो ।
प्रतिक्रिया दिनुहोस !
