वीरगन्ज : प्रधानमन्त्री कप पुरुष राष्ट्रिय क्रिकेट प्रतियोगिताअन्तर्गत मंगलबार सम्पन्न खेलमा नेपाल पुलिस क्लब विजयी भएको छ। वीरगन्जस्थित नारायणी क्रिकेट मैदानमा पुलिसले कोशीलाई ६ विकेटले पराजित गरेको हो।
कोशीले दिएको एक सय ६३ रनको लक्ष्य पछ्याउन मैदानमा उत्रिएको पुलिसले ३३.५ ओभरमा चार विकेट गुमाउँदै एक सय ६५ रन बनायो। पुलिसको जितमा कप्तान आरिफ शेख र अलराउण्डर रशिद खानले उत्कृष्ट ब्याटिङ गर्दै अर्धशतक पूरा गरे।
एक सय ५४ रनको साझेदारी गर्ने क्रममा आरिफले ७९ बलको सामना गर्दै ८१ रन जोडे। उनले ११ चौका र एक छक्का प्रहार गरे। अर्का ब्याटर रशिदले ९० बलमा ७९ रन बनाए। उनले आठ चौका र एक छक्का प्रहार गरे।
११ रनको स्थितिमा चार विकेट गुमाएर लरखराएको पुलिसको इनिङलाई सम्हाल्दै आरिफ र रशिदले सम्झनलायक प्रदर्शन गरे। पुलिसका ओपनर दिनेश खरेल दुई रन बनाएर आउट हुँदा शंकर राना, अमित श्रेष्ठ र दिलशाद अलीले शून्यमै मैदान छोडे। लगातार विकेट गुमाउँदा निराश बनेको पुलिसको ड्रेसिङरुमलाई आरिफ र रशिदले खुशी दिलाए।
यसअघि टस हारेर ब्याटिङ गरेको कोशीले ४३.५ ओभरमा सबै विकेट गुमाउँदै एक सय ६२ रन जोडेको थियो। कोशीका लागि कप्तान सुजन थपलियाले ४८, ओपनर सुमन श्रेष्ठले ४३, अंकित सुवेदीले २६, शिवांश बजगाईंले १५ रन बनाए। कोशीका अन्य ब्याटरले दोहोरो अंकमा रन बनाउन सकेनन्।
कोशीलाई मध्यम योगफलमा रोक्ने क्रममा पुलिसका दिनेश खरेल एक्लैले पाँच विकेट लिए। प्लेयर अफ दि म्याच घोषित खरेलले सोनु अंसारी, समिर कार्की, प्रेम कामत, शिवांश बजगाईं र विपिन महतोको विकेट लिँदै 'फाइफर' पूरा गरेका थिए। यसैगरी ललित राजवंशी र सागर ढकालले समान दुई/दुई विकेट लिए।
जितसंगै पुलिस तालिकाको शीर्षस्थानमा उक्लिएको छ। पाँच खेलमा पुलिसले सात अंक जोडेको छ। चार खेलमा समान सात अंक जोडेको मधेस रनरेटका आधारमा दोस्रो स्थानमा झरेको छ।
जारी प्रतियोगितामा पुलिसले वीरगन्जमा खेलेको यो पहिलो खेल हो। प्रतियोगितामा पाँच खेल खेलेको पुलिसले यसअघि काठमाडौंस्थित माथिल्लो मुलपानी मैदानमा तीन र तल्लो मुलपानी मैदानमा एक खेल खेलेको थियो।
पहिलो खेलमा त्रिभुवन आर्मीसँग २२ रनले पराजित भएको पुलिसले दोस्रो खेलमा नेपाल एपीएफ क्लबलाई एक सय ८५ रन र तेस्रो खेलमा बागमती प्रदेशलाई सात विकेटले पराजित गरेको थियो। चौथो खेलमा भने वर्षा बाधक बनेपछि पुलिसले गण्डकीसँग अंक बाँडेको थियो।
प्रतियोगिताअन्तर्गत बुधबार वीरगन्जस्थित नारायणी मैदानमा नेपाल एपीएफ क्लब र लुम्बिनी प्रदेश भिड्नेछन् भने जकनपुरस्थित रामजानकी मैदानमा बागमती प्रदेश र कर्णालीबीच खेल हुनेछ।
प्रतिक्रिया दिनुहोस !
