बाजुरा : बाजुराको गौमुल गाउँपालिका–३ मा अविरल वर्षापछि गएको पहिरोले रौदीगाड लघु जलविद्युत् आयोजना पूर्णरूपमा क्षति भएको छ । शनिबार रातिदेखि परेको वर्षापछि माथिबाट आएको पहिरोले पावरहाउसमा क्षति पु¥याएपछि बिद्युत सेवा अवरुद्ध भएको हो ।
गौमुल गाउपालिका–३ का अध्यक्ष गोरख बोहराका अनुसार रातिदेखिको वर्षासँगै आएको पहिरोले विद्युत् नहरको पाइप फुट्दा पहिरो खसेको हो । पहिरोले आयोजनाको भवन छोप्नुका साथै विभिन्न उपकरणमा क्षति पुगेपछि विद्युत् सेवा पूर्णरूपमा अवरुद्ध भएको बोहोराले बताए ।
रौदीगाड लघु जलविद्युत आयोजनाका अध्यक्ष लालबहादुर रोकायाका अनुसार पहिरोका कारण भवनसँगै जेनेरेटर, ट्रान्समिटर, मदरबोर्ड, एलसीलगायतका महत्वपूर्ण उपकरणहरूमा क्षति भएको छ । वि.सं. २०६९ चैत २५ गतेदेखि सञ्चालनमा आएको ३१.५ किलोवाट क्षमताको उक्त आयोजनाबाट गौमुल ३ का २ सय बढी घरधुरी लाभान्वित हुँदै आएका थिए । हाल वैकल्पिक ऊर्जाको व्यवस्था नभएकाले स्थानीयवासी अन्धकारमा बस्न बाध्य हुने भएका छन् ।
विद्युत् सेवा अवरुद्ध हुँदा स्थानीय विद्यालय, स्वास्थ्य संस्था तथा वडा कार्यालयका दैनिक कार्य सम्पादनमा समेत प्रभावित हुने भएका छन् । पहाडी भू–भागमा कमजोर र भिरालो जमिनका कारण निरन्तर वर्षासँगै थप पहिरोको जोखिम उच्च रहेको स्थानीयको भनाइ छ । घटनापछि क्षतिको विवरण संकलनका लागि गाउँपालिकाको केन्द्र घट्मुनाबाट प्रहरी टोली खटिएको जिल्ला प्रहरी कार्यालय बाजुराले बताएको छ ।
पहिरोले कति क्षति भएको भन्ने एकीन विवरण प्रहरी टोली पुगेपछि मात्र जानकारी हुने प्रहरी कार्यालयले बताएको छ । वडा अध्यक्ष बोहराले विद्युत् सेवा पुनः सञ्चालनका लागि मर्मत तथा पुनर्निर्माण प्रक्रिया अगाडि बढाइने जानकारी दिए । स्थानीयवासीले तत्काल पुनर्निर्माण तथा वैकल्पिक ऊर्जा व्यवस्थापन गर्न सम्बन्धित निकायसँग माग गरेका छन् ।
प्रतिक्रिया दिनुहोस !
