वीरगन्ज : विभागीय टोली एपीएफ क्लबले मधेस प्रदेशलाई पराजित गरेसंगै सुदूरपश्चिम प्रदेश प्रधानमन्त्री कप पुरुष राष्ट्रिय क्रिकेट प्रतियोगिताको फाइनलमा प्रवेश गरेको छ । वीरगन्जस्थित नारायणी मैदानमा सोमबार एपीएफ ७४ रनले बिजयी हुँदा १२ अंकसहित तालिकाको दोस्रो स्थानमा रहेको सुदूरपश्चिम फाइनलमा प्रवेश गरेको हो । सुदूरपश्चिमले अब त्रिभुवन आर्मीसंग बैशाख ४ गते फाइनल खेल्नेछ । फाइनलमा प्रवेश गरेको आर्मीको १३ अंक छ । दुई खेल अगावै फाइनलमा प्रवेश गरेको आर्मीले अब अन्तिम खेल लुम्बिनीसँग खेल्नेछ ।
प्रधानमन्त्री कपको फाइनल खेल्ने सम्भावना कायम राख्न ९ अंकसहित तालिकाको चौथो स्थानमा रहेको मधेसलाई एपीएफविरुद्ध जित आवश्यक थियो । एपीएफ र नेपाल पुलिसको खेलमा जित निकालेको भए मधेस १३ अंकसहित फाइनलमा प्रवेश गर्ने निश्चित थियो । तर एपीएफसँगको हारसँगै पाँचौं स्थानमा झरेको मधेसको फाइनल यात्रा समाप्त भएको हो ।
मधेस र पुलिसबीचको भिडन्त अब तालिकाको तेश्रो वा चौथो स्थानका लागि मात्रै हुनेछ । ९ अंकसहित पुलिस चौथो स्थानमा छ भने पाचौं स्थानमा रहेको मधेसको पनि ९ अंक छ । एपीएफ ११ अंकसहित तेस्रो स्थानमा उक्लिएको छ । मधेस र पुलिसबीचको विजेताले दुई अंक प्राप्त एपीएफसंग बराबरी हुनेछ र नेटरनरेटका आधारमा तेस्रो हुने टिमको टुंगो लाग्नेछ ।
एपीएफलाई पराजित गर्दै शीर्ष दुईको सम्भावना जिवित राख्ने दाउमा रहेको मधेसविरुद्ध आशिफ शेख बाधक बने । आशिफले विष्फोटक ब्याटिङ गर्दै प्रधानमन्त्री कपको इतिहासै पहिलो पटक दोहोरो शतक बनाए । प्लेयर अफ दि म्याच आशिफले १४२ बलमा २०८ रन जोडे । आशिफ प्रधानमन्त्री कपको एउटै इनिङमा सर्वाधिक रन बनाउने खेलाडी बनेका छन् । यसअघि उक्त रेकर्ड एपीएफका तत्कालिन खेलाडी प्रदीप ऐरीको नाममा थियो । प्रदीपले सन् २०१८ मा किर्तिपुरस्थित त्रिवि मैदानमा मधेस प्रदेशविरुद्धनै १५८ रन जोडेका थिए ।
आफ्नै गृह जिल्लामा इतिहास रच्ने क्रममा आशिफ एउटै इनिङमा सबै भन्दा बढी छक्का प्रहार गर्ने खेलाडी समेत बनेका छन् । आशिफले मधेस प्रदेशविरुद्ध १७ वटा छक्का र १५ वटा चौका प्रहार गरे । यसअघि उक्त रेकर्ड ११ वटा छक्का प्रहार गर्ने सुन्दर खनालको नाममा थियो । सन् २०१७ मा पश्चिमाञ्चलबाट खेलेका सुन्दरले एपीएफविरुद्ध ११ वटा छक्का प्रहार गर्दै अविजित ९० रन बनाएका थिए ।
समूह चरणको अन्तिम खेलमा शानदार ब्याटिङ गरेका आशिफ जारी प्रतियोगिता अवधीभर सर्वाधिक रन बनाउने खेलाडीको सूचीमा सातौंबाट दोस्रो स्थानमा उक्लिएका छन् । आशिफले ४५७ रन बनाएका छन् । उनीभन्दा माथि ४९८ रन जोडेका गण्डकीका अर्जुन कुमाल छन् । गण्डकीले एक खेल खेल्न बाँकी छ ।
प्रधानमन्त्री कप अन्तर्गत लिगको खेल टुंयाएको एपीएफले समेत नयाँ रेकर्ड कायम गरेको छ । एपीएफले एउटै इनिङमा सर्वाधिक रन बनाउने टोलीको किर्तिमान बनाएको हो । जारी प्रधानमन्त्री कपमै आफूविरुद्ध नेपाल पुलिसले मुलपानी मैदानमा बनाएको ३३५ रन रेकर्ड तोड्दै एपीएफले नयाँ किर्तिमान खडा गरेको हो ।
मधेसविरुद्ध ५० ओभरमा पाँच विकेट गुमाउँदै ३९० रन बनाउने क्रममा कप्तान रोहित पौडेलले ५५ र सन्दीप जोराले ५६ रनको अर्धशतकीय पालि खेले । लोकश बम २१ र कमल ऐरी १८ रनमा अविजित रहे । मधेसका रुपेश सिंहले तीन र रञ्जित कुमारले एक विकेट लिए ।
एपीएफले प्रस्तुत गरेको विशाल लक्ष्य पछ्याएको मधेस ५० ओभरमा आठ विकेट गुमाएर ३१६ रन जोड्यो । एपीएफविरुद्ध खराब सुरुवात गर्दा निराश बनेका दर्शकलाई मधेसको मध्यक्रमका ब्याटरले आशा जगाएका थिए । ओपनर मयन यादव शून्यमै पेभेलियन फर्किएपछि कप्तान अनिल साह र महमद समीरले इनिङ सम्हालेका थिए । साह व्यक्तिगत २९ रनमा आउट भए । लगत्तै आएका पवन सर्राफले पनि सात रन मात्रै बनाए ।
सुरुवाती ब्याटर आउट भएपछि सुस्ताएको मधेसको इनिङलाई अरनिको यादव, आदिल आलम, विशाल सुस्लिङले सम्हाल्ने प्रयास गरे । उनीहरुको शानदार ब्याटिङका कारण मधेसले तीन सय रनको योगफल कटाएपनि हार टार्न सकेनन् । मधेसले ५० ओभरमा आठ विकेट गुमाएर ३१६ रन जोड्यो । आदिलले विष्फोटक ब्याटिङ गर्दै ४३ बलमा ८६ रन बनाए । आदिलले आठ छक्का र ६ चौका प्रहार गरे । अरनिकोले ६ छक्का र आठ चौकासहित ८६ रन प्रहार गरे । विशालले ३९ रन जोडे । एपीएफलका अभिषेक गौतमले तीन विकेट लिए । कमल ऐरीले दुई विकेट लिँदा रोहित पौडेल, भुवन कार्की र युवराज खत्रीले एक÷एक विकेट हात पारे ।
प्रतिक्रिया दिनुहोस !
