सरकार प्रेस स्वतन्त्रताप्रति प्रतिबद्ध छ : सञ्चारमन्त्री डा. तिमिल्सिना

हेटौडा : सञ्चार तथा सूचना प्रविधिमन्त्री डा. बिक्रम तिमिल्सिनाले अहिलेको सरकार प्रेस स्वतन्त्रताप्रति प्रतिबद्ध रहेको बताएका छन् । नेपाल पत्रकार महांसघ बागमती प्रदेश समितिले बुझाएको ध्यानकार्षण पत्र बुझ्दै मन्त्री तिमिल्सिनाले विज्ञापन नियमन र ब्यवस्थित गर्ने समेत बताए ।  यस्तै उनले स्थानीय तहको विज्ञापन सूचना सबैले पाउने तर, ब्यवस्थित गर्न केही समय लाग्ने बताए । उनले भने, ‘सञ्चार जगत र सरकार मिलेरै अघि बढ्ने हो । सरकार प्रेस स्वतन्त्रताप्रति प्रतिबद्ध रहेको छ ।’  

गत चैत २७ र २८ गते दोलखाको जिरीमा भएको प्रदेश समितिको वैठकले तय गरेको साझा धारणा तथा निर्णय कार्यान्वयनका लागि मन्त्री तिमिल्सिनालाई ध्यानाकर्षण पत्र बुझाएको हो । उक्त वैठकमा प्रदेश समिति अन्तर्गतका जिल्ला अध्यक्षहरू तथा प्रदेशस्तरीय पत्रकार संगठनका अध्यक्ष एवं प्रतिनिधिहरूको उपस्थितिमा ६ बुदे साझा धारणा तय गरेको थियो ।

विहीबार सोही वैठकका धारणासहित सञ्चार मन्त्रीलाई भेटी ध्यानकार्षण पत्र हस्तान्तरण गरिएको  नेपाल पत्रकार महांसघ बागमती प्रदेश समितिका अध्यक्ष कृष्ण सारु मगरले जानकारी दिए । ध्यानाकर्षण पत्रमा सरकारी विज्ञापन प्रकाशन–प्रसारणमा देखिएको अनियमितता तथा भ्रष्टाचार नियन्त्रणका लागि सरकारले चालेका प्रयासहरूको स्वागत गर्दै यसभित्रका विकृतिहरूको निष्पक्ष छानबिन गर्न माग गरिएको छ ।

यस्तै सरकारी विज्ञापन बितरणमा सरकारी र निजी मिडियामा बिभेद नगर्न सरकारलाई आग्रह गरिएको छ । यस्तै श्रमजीवि पत्रकारहरूले सञ्चालन गरेका साना तथा स्वरोजगारमुखी सञ्चारमाध्यमहरूको हित र प्रवद्र्धनका लागि पूर्ण समानुपातिक विज्ञापन नीति कार्यान्वयन गर्न माग गरिएको छ । स्थानीयस्तरमा प्रवाह गरिने सूचना तथा जनचेतनामूलक सन्देशहरू स्थानीय सचारमाध्यममार्फत नै प्रकाशन–प्रसारण हुने व्यवस्था मिलाउन तीनै तहका सरकारको ध्यानाकर्षण गराएको छ ।

संविधानले सुनिश्चित गरेको प्रेस तथा अभिव्यक्ति स्वतन्त्रतालाई नियन्त्रण गर्ने कुनै पनि क्रियाकलाप नगर्न सरकारसँग आग्रह गरिएको छ । यस्तै अन्तिम बुदाँमा प्रदेश सरकारका निकायमा दर्ता भएका सञ्चारमाध्यम सम्बन्धी विद्यमान अन्योलता अन्त्य गर्न प्रदेश र संघीय सरकारबीच समन्वय गरी तत्काल समस्या समाधान गर्न ध्यानाकर्षण गराएको छ ।