किम जोङ उन सत्ताको उत्तराधिकारीका लागि छोरीलाई यसरी गर्दैछन् तयार

उत्तर कोरिया : उत्तर कोरियाका नेता किम जोङ उनले आफ्नी छोरी किम जु एलाई उत्तराधिकारीको रूपमा तयार गर्दै गरेको संकेत आइरहेका छन् ।
उत्तर कोरियामा ‘पश्चिमी लग्जरी’ शैलीका कपडा लगाउनु विद्रोह र समाजवादविरोधी मानिन्छ र त्यस्ता कपडामा प्रतिबन्ध पनि छ । तर किम जु ए बारम्बार यस्ता कपडामा देखिन थालेकी छन् । यसलाई सामान्य किशोरावस्थाको परिवर्तन नभई उनलाई भविष्यको सर्वोच्च नेताका रूपमा प्रस्तुत गर्ने रणनीतिसँग जोडेर हेरिएको छ ।

सन् २०१३ मा जन्मिएकी जु एले नोभेम्बर २०२२ मा पहिलो पटक सार्वजनिक रूपमा देखिएकी थिइन्, त्यो बेला उनी मात्र ९ वर्षको थिइन् । उनी आफ्ना बुबासँग एक अन्तरमहादेशीय ब्यालिस्टिक मिसाइलको अगाडि हिँडिरहेको अवस्थामा देखिएकी थिइन् । त्यतिबेला उनी लामो कपाल, कालो पाइन्ट र सेतो ज्याकेटमा निकै प्रभावशाली देखिन्थिन् ।

त्यसयता उनको हेयरस्टाइल र पहिरन झन् पश्चिमी शैलीतर्फ झुकेको देखिन्छ । सन् २०२० मा उत्तर कोरियाले ‘रिएक्शनरी आइडियोलोजी एन्ड कल्चर रिजेक्शन एक्ट’ लागू गरेको थियो । जसले बाहिरी संस्कृतिमा रोक लगाउँछ । तर त्यसको बाबजुद २०२३ मा सरकारी समाचार एजेन्सीले सार्वजनिक गरेको भिडियोमा जु ए फेरि आफ्ना बुबासँग मिसाइल नजिकै देखिएकी थिइन् । यस पटक उनले लगाएको ज्याकेट फ्रान्सेली लग्जरी ब्रान्ड ‘क्रिश्चियन डियोर’ को भएको बताइएको थियो, जसको मूल्य करिब १,९०० डलर (करिब १ लाख ८० हजार रुपैयाँ) थियो ।

अर्को वर्ष, प्योङयाङको नयाँ आवासीय क्षेत्रमा आयोजित उद्घाटन कार्यक्रममा उनले लगाएको पहिरनलाई एक भिडियो भाषणमा ‘एण्टी–सोसियलिस्ट’ भनेर आलोचना गरिएको थियो । तर त्यसैबीच केही मानिसहरूले उनको शैलीको नक्कल गर्न चाहेको पनि बताइएको छ । विशेषज्ञहरूका अनुसार समयसँगै उत्तर कोरियामा पनि पुस्तागत परिवर्तन भइरहेको छ ।

२०१० पछि धेरै कामदारहरू विदेशी मुद्रा कमाउन विदेश गएका छन् । विशेषगरी कोभिड–१९ महामारीका बेला चीनमा बसेका कामदारहरू फर्किंदा त्यहाँको संस्कृतिको प्रभाव पनि सँगै ल्याएका छन् । पहिले लग्जरी सामानहरू मुख्यतः जापानबाट आउने गर्थे, तर अहिले विभिन्न अन्तर्राष्ट्रिय ब्रान्डबारे उत्तर कोरियालीहरूलाई जानकारी हुन थालेको छ।

यस्ता सामान महँगा हुने भएकाले धेरैले सुरुमा परफ्युमजस्ता वस्तुबाट अनुभव लिन थाल्छन् । जु ए परिवारकी पहिलो ‘फेशन आइकन’ भने होइनन् । विश्लेषकहरूका अनुसार उनलाई उनकी आमा री सोल जू जस्तै परिपक्व र स्टाइलिश देखिने गरी तयार पारिन्छ, ताकि उनको वास्तविक उमेर कम देखियोस् । उत्तर कोरियामा सामान्य युवतीले यस्तो पश्चिमी फेशनको नेतृत्व गर्नु लगभग असम्भव मानिन्छ ।