काठमाडौं : भेनेजुएलामा बुधबार आएको विनाशकारी भूकम्पका कारण अहिलेसम्म ९२० जनाको मृत्यु भएको पुष्टि भएको छ भने ३ हजार ३ सय ६० भन्दा बढी मानिस घाइते भएका छन्। सरकारका अनुसार भग्नावशेषमा अझै सयौँ मानिसहरू फसिरहेकाले मृतकको संख्या अझै बढ्न सक्ने अनुमान गरिएको छ।
परकम्पहरू जाने क्रम नरोकिएको यस विपद्मा राजधानी काराकाससहित देशको उत्तरी क्षेत्र सबैभन्दा बढी प्रभावित भएको छ। विशेष गरी 'ला गुएरा' क्षेत्रमा ठूलो क्षति पुगेको छ, जहाँ देशको मुख्य विमानस्थल र बन्दरगाहसमेत अवस्थित छन्। भग्नावशेषमुनि आफ्ना आफन्तहरू फसेका परिवारहरू यतिबेला अत्यन्तै छटपटी र पर्खाइमा छन्।
विगत लामो समयदेखि आर्थिक संकट झेल्दै आएको भेनेजुएलाको स्वास्थ्य प्रणाली यो विपद्पछि पूर्ण रूपमा अस्तव्यस्त भएको छ। स्थानीय चिकित्सकहरूका अनुसार अस्पतालहरूमा औषधि र अत्यावश्यक स्वास्थ्य सामग्रीको चरम अभाव छ, जसका कारण घाइतेहरूको उपचार अस्थायी शिविरहरूमा गर्नुपर्ने बाध्यता छ।
यसैबीच, बेलायत, अमेरिका, मेक्सिको र नेदरल्याण्ड्स लगायतका देशहरूबाट तालिमप्राप्त कुकुर, ड्रोन र विशेषज्ञसहितका अन्तर्राष्ट्रिय उद्धार टोलीहरू भेनिजुएला पुग्न थालेका छन्। अमेरिकाले १५ करोड डलर सहायताका साथै युद्धपोत र ढुवानी विमानहरू परिचालन गर्ने घोषणा गरेको छ।
विपद्का बीच केही सुखद् खबरहरू पनि आएका छन्। ला गुएरामा एउटै परिवारका तीन साना बालबालिकालाई भग्नावशेषबाट जीवितै उद्धार गरिएको छ, जसले उद्धारकर्मीहरूमा नयाँ उत्साह थपेको छ। त्यस्तै, भूकम्पमा आफ्नी छोरीलाई बचाउने क्रममा ज्यान गुमाएकी एक फुटबलरकी श्रीमतीको वीरतापूर्ण कथाले यतिबेला धेरैलाई भावुक बनाएको छ।
राजनीतिक र आर्थिक अस्थिरताका बीच आएको यो प्राकृतिक विपद्ले भेनिजुएलालाई मर्माहत बनाएको छ। संयुक्त राष्ट्रसंघले यस संकटको सामना गर्न विश्वव्यापी साझा प्रयासको आह्वान गरेको छ।
प्रतिक्रिया दिनुहोस !
