भेनेजुएला भूकम्प : छोरीलाई बचाउँदै आमाको मृत्यु, पतिले गरे भावुक पोस्ट

भेनेजुएला : भेनेजुएलामा आएको भूकम्पका क्रममा आफ्नी छोरीलाई बचाउने क्रममा एक आमाको मृत्यु भएको छ । यो जानकारी फुटबलर हेक्तोर बेलो र स्थानीय मिडियाले दिएका छन् । बेलोले आफ्नो इन्स्टाग्राममा लेख्दै आफ्नी पत्नी एन्ड्रियालाई ‘मेरो प्रिय प्रेम’ भन्दै सम्बोधन गरेका छन् ।

उनले बताए अनुसार, एन्ड्रियाले दुई वर्षीय छोरीलाई शक्तिशाली भूकम्पका बेला ज्यान जोखिममा राखेर बचाइन् । ‘म तिमीलाई हाम्रो छोरीलाई बचाएको कथा सुनाउनेछु, मेरी प्रिय—तिमीले कसरी आफ्नो जीवन बलिदान दिइयौ, कसरी अन्तिम साससम्म पनि उनलाई छोडेनौ’, बेलोले लेखेका छन्। उद्धारकर्मीहरू अझै पनि भग्नावशेषमा फसेका मानिसहरूको खोजीमा छन् ।

राजधानी कराकस नजिक आएका दुई ठूला भूकम्पका कारण कम्तीमा ९२० जनाको मृत्यु भएको छ र ३,००० भन्दा बढी घाइते भएका छन् । बेलोले सामाजिक सञ्जालमा लेख्दै आफू कराकस पुगेको र छोरी अस्पतालमा रहेको जानकारी दिएका छन् । ‘मेरी छोरी र उनकी काकी ठीक छन्, आज डिस्चार्ज हुँदैन-उनीहरू अस्पतालमै बस्ने छन् । यो अपार पीडामा साथ दिनु भएकोमा धन्यवाद’, उनले शुक्रबार राति लेखेका छन् ।

अर्को इन्स्टाग्राम स्टोरीमा उनले लेखेका छन्, ‘म कसरी मेरी छोरीलाई भन्नू कि तिमीले उसको जीवन बचायौ र म केही गर्न त्यहाँ हुन सकिनँ ? मलाई शक्ति देऊ ।’ स्थानीय फुटबलसम्बन्धी संस्था ‘कुमाना डे क्याम्पियोनेस’ ले पनि उनको मृत्युबारे पोस्ट गरेको छ । उनीहरूले लेखेका छन् कि फुटबलर हेक्तोर बेलोकी पार्टनर ‘केइके’ भूकम्पपछि भग्नावशेषमा मृत अवस्थामा फेला परेकी हुन् ।

यद्यपि उनकी छोरी भने भवन भत्किँदा बाँच्न सफल भएकी छन् । अमेरिकी स्पेनिश मिडिया युनिभिजनले पनि उक्त मृत्युको पुष्टि गरेको छ । भूकम्पपछि अझै धेरैको मृत्यु पुष्टि हुँदै गएको छ र धेरै मानिसहरू अझै बेपत्ता छन् । यस घटनामा दुई फुटबल खेलाडी पनि ज्यान गुमाउनेमा परेका छन्, उनीहरूको क्लब र भेनेजुएला फुटबल महासंघले पुष्टि गरेको छ । कराकस फुटबल क्लबका अनुसार, यसको अन्डर–१८ खेलाडी रजान सिज्जा आफ्नो परिवारसँगै ला ग्वाइरामा रहेको घरमा मृत्यु भएका थिए ।

त्यसैगरी, क्लब स्पोर्ट सान अगस्टिनले आफ्नो एकेडेमीका भिक्टर पलासियोसको मृत्यु भएको जनाएको छ । पूर्व मिस भेनेजुएला गिसेल रेजेसले पनि आफ्नो आमाको मृत्यु भएको जानकारी दिएकी छन् । उनका अनुसार, भूकम्पका कारण भवन पूर्ण रूपमा भत्किँदा आमाको ज्यान गएको हो । रेजेसले भनिन् कि उनकी आमाको मृत्यु भूकम्पको झट्का र तनावका कारण हृदयघात भएर भएको हो । उनलाई हेरचाह गर्दै आएकी नर्सले उद्धार पाएपछि यो जानकारी दिएकी थिइन् ।