भारत : एक महिलाले भारत मुम्बईको वसईमा आफ्नै श्रीमानसँग मिलेर प्रेमीको हत्या गरेकी छन् । त्यसपछि शवलाई निलो ड्रममा हालेर नालामा फालिएको थियो । प्रहरीले शव बरामद गर्दै आरोपी महिलालाई पक्राउ गरेको छ ।
मेरठको ‘निलो ड्रम’ काण्ड धेरैलाई याद नै होला । त्यहाँ मुस्कान नामकी महिलाले आफ्ना प्रेमीसँग मिलेर श्रीमानको हत्या गरी शवलाई निलो ड्रममा राखेर माथिबाट सिमेन्ट हालेर लुकाएकी थिइन् । यस पटक भने घटना उल्टो भएको छ । मुम्बईको वसईमा एक महिलाले आफ्नै श्रीमानसँग मिलेर आफ्ना इन्जिनियर प्रेमीलाई कुटपिट गरी हत्या गरिन् । त्यसपछि शवलाई निलो ड्रममा हालेर नालामा फालियो । रिपोर्टअनुसार ती महिलाले प्रेमीसँग बारम्बार पैसा माग्ने गर्थिन् । जब प्रेमीले पैसा दिन अस्वीकार गरे, त्यसपछि दुवैले मिलेर उनको हत्या गरेका हुन् ।
मुम्ब्रा प्रहरीले २५ वर्षीया महिला र उनका भाइलाई पक्राउ गरेको छ । यस हत्याकाण्डमा महिलाका भाइ, श्रीमान तथा अर्का एक व्यक्ति पनि संलग्न रहेको प्रहरीले जनाएको छ । आरोपी श्रीमान र उनका साथी भने अझै फरार छन् । मृतक इन्जिनियरको पहिचान २६ वर्षीय अरबाज मकसुद अली खानका रूपमा भएको छ । उनी डोम्बिवलीस्थित एक रियल स्टेट डेभलपर कम्पनीमा काम गर्थे ।
प्रहरीका अनुसार मेहजबीन खातुन लामो समयदेखि अरबाजसँग सम्बन्धमा थिइन् । सुरुमा उनीहरूबीच सामान्य कुराकानी मात्रै हुने गथ्र्यो । पछि मेहजबीनले अरबाजसँग पैसा माग्न थालिन् । अरबाजले बेला–बेलामा मेहजबीनको खातामा पैसा पठाउने गर्थे । तर जब उनले पैसा पठाउन बन्द गरे, त्यसपछि मेहजबीन रिसाइन् र हत्या गर्ने योजना बनाइन् ।
मेहजबीनले आफ्ना श्रीमान र भाइसँग मिलेर हत्या गर्ने योजना बनाएको प्रहरीले जनाएको छ । घटनाको दिन अरबाज आफ्नो कम्पनी गएका थिए, तर साँझ घर नफर्किएपछि उनका बुबाले मुम्ब्रा प्रहरी चौकीमा उजुरी दिएका थिए । अरबाजको मोबाइल लोकेशन ट्रयाक गर्दा उनी मेहजबीनको घरबाटै हराएको खुल्यो । प्रहरीले यो पनि पत्ता लगायो कि घटनाभन्दा एक दिनअघि मात्रै अरबाजले मेहजबीनको खातामा ५० हजार रुपैयाँ पठाएका थिए । सुरुमा मेहजबीनले हत्या स्वीकार नगरे पनि पछि अपराध स्वीकार गरिन् ।
प्रहरीका अनुसार तीन जनाले मिलेर अरबाजका हातखुट्टा बाँधे र प्लास्टिकको पाइपले निर्घात कुटपिट गरे । टाउकोमा गम्भीर चोट लागेपछि उनको मृत्यु भएको थियो । त्यसपछि आरोपितहरूले शवलाई निलो ड्रममा हालेर नालामा फालिदिएका थिए । प्रहरीले आरोपितहरूविरुद्ध बीएनएसको धारा १४०, ३ (५), १०३ (१) र २३८ अन्तर्गत मुद्दा दर्ता गरेको जनाएको छ ।
प्रतिक्रिया दिनुहोस !
