जनकपुरधाम : मञ्जुरी बिना गौशाला नगरपालिकाले ढल निकास गर्न खोजेपछि रोक्न गएका निगौल गाई गौशालाका कार्यालय प्रमुख कान्तिकुमारी पाण्डेको विवादमा उच्च अदालत जनकपुरले नगरपालिकाको नाममा निषेधाज्ञा आदेश जारी गरेको छ ।
उच्च अदालत जनकपुरले निगौल गाई गौशालाको जग्गामा मञ्जुरी बिना गौशाला नगरपालिकालाई हस्तक्षेप नगर्न दिएको आदेशको उल्लंघन गरेको बेलामा उच्च अदालतले पुनः १५ दिने म्यादसहितको लिखित जवाफ पेश गर्न भन्दै कुनै प्रकारको ढल निकास एवं पक्की नाला निर्माण गर्नेलगायतका कुनै कार्य तत्काल नगर्नु नगराउनु, निर्माण कार्य शुरु गरेको भए यथास्थितिमा राखु भनी आदेश गरेको हो ।
उच्च अदालत जनकपुर न्यायाधीश राजुराम सिलवालको एकल इजलासले दिएको आदेशमा भनिएको छ, ‘निवेदनमा उल्लिखित कि.नं. ८२, ८३, ८४ को जग्गा निगौल श्री गोपाल गौशालाको नाउँमा रहेको भन्ने निवेदकले निवेदन साथ पेश गरेको जग्गाधनी प्रमाणपूर्जाको प्रतिलिपीबाट देखियो । उल्लेखित जग्गाको विषयमा यिनै निवेदकले यिनै विपक्षीहरुउपर दिएको निवेदन नं.०८२–००४३ को नि. नं.२८२ को निषेधाज्ञा मुद्दामा प्रस्तुत निवेदनमा उल्लेखित जग्गामा कुनै प्रकारले हस्तक्षेप नगर्नु नगराउनु भनी मिति २०८२-१०-२० गते यसै अदालतवाट विपक्षीहरुको नाउँमा आदेश भएको छ ।’
आदेशमा थप भनिएको छ, ‘निवेदकले निवेदनसाथ पेश गरेको फैसलाको प्रतिलिपिबाट देखिएको अवस्थामा पुनः निवेदक कार्यालयको नाउँमा रहेको उक्त जग्गाहरुमा निवेदक कार्यालय तथा सम्वन्धित विभागमा कानून बमोजिम समन्वय नगरी विपक्षीहरुवाट ढल निकासको कार्य गर्दा निवेदक निगौल श्री गोपाल गौशालालाई अपुरणीय क्षति हुन सक्ने देखिएकाले प्रस्तुत निवेदनको अन्तिम निर्णय नभएसम्म उक्त जग्गामा कुनै प्रकारको ढल निकास एवं पक्की नाला निर्माण गर्ने लगायतका कुनै कार्य तत्काल नगर्नु नगराउनु, निर्माण कार्य शुरु गरेको भए यथास्थितिमा राखु भनी विपक्षीहरुको नाउँमा मुलुकी देवानी कार्यविधि संहिता, २०७४ को दफा १५८ बमोजिम अन्तरिम आदेश जारी गरिदिएको छ । आदेशको जानकारी विपक्षीहरुलाई दिनू ।’
निगौल गाई गौशाला व्यवस्थापन कार्यालयको तर्फबाट अख्तियारवाला कान्तिकुमारी पाण्डेको निवेदनको आधारमा उच्च अदालतले दोश्रो पटक निषेधाज्ञा मुद्दामा विपक्षी गौशाला नगरपालिकाको कार्यालयलाई भनेको छ, ‘यसमा के कसो भएको हो ? निवेदकको निवेदन माग बमोजिमको आदेश जारी हुन पर्ने हो, होइन ? आदेश जारी हुनु नपर्ने कुनै आधार र कारण भए सो समेत खुलाई यो सूचना प्राप्त भएको मितिले बाटाको म्याद वाहेक १५ (पन्ध्र) दिनभित्र विपक्षहरुले आफै वा आफ्नो कानून बमोजिमको प्रतिनिधिमार्फत लिखित जवाफ पेश गर्नुहोला भनी यो आदेश र निवेदनको प्रतिलिपी समेत साथै राखी विपक्षीको नाउँमा म्याद-सूचना जारी गरी लिखित जवाफ परे वा अवधि व्यतित भएपछि नियमानुसार पेश गर्नु होला ।’
यसै घटनामा निगौल गाई गौशाला व्यवस्थापन कार्यालयका प्रमुख कान्तिकुमारी पाण्डेलाई नगरपालिकाबाट खटिएको नगर प्रहरीको १० जनाको टोलीले गत विहिवार साँझ करिब ५ बजे कुटपिट गरेको थियो । गौशाला नगरपालिकाले निगौल गाई गौशालाको जग्गामा बजार ठेक्का लगाउने र जर्बजस्ती ढल निकास गर्न खोजेपछि रोक्न गएको कार्यालय प्रमुखलाई पाण्डेलाई नगर प्रहरीहरुले दुर्व्यवहार गर्दै कुटपिट गरेको भिडियो सार्वजनिक भएको थियो । नगरपालिकाले गाई गौशालालाई करिब ६ करोड भुक्तानी नगर्दा विवाद लामो समयदेखि पटक–पटक विवाद हुँदै आएको निगौल गाई गौशालाका कार्यालय प्रमुख कान्ति पाण्डेको आरोप छ ।
प्रतिक्रिया दिनुहोस !
