प्रधानमन्त्री मोदीले जापानी समकक्षी ताकाचीलाई किन भने ‘सानो बहिनी’ ?

भारत : भारत–जापानबीच भएको १६ औं वार्षिक शिखर सम्मेलनपछि आयोजित संयुक्त पत्रकार सम्मेलनमा भारतीय प्रधानमन्त्री नरेन्द्र मोदीले जापानकी समकक्षी सानाए ताकाचीलाई आफ्नो ‘सानो बहिनी’ भनेर सम्बोधन गरेपछि धेरैको ध्यान त्यसतर्फ गएको थियो । सार्वजनिक मञ्चमा आफ्ना भावनाहरू कमै व्यक्त गर्ने मोदीको यस्तो सम्बोधनले सबैलाई चासो जगायो । तर यसको वास्तविक कारण भने हैदराबाद हाउसमा दुई नेताबीच भएको विशेष संवादमा लुकेको थियो ।

हैदराबाद हाउसमा के भएको थियो ?
दुई नेताबीचको भेटवार्ताबारे जानकारी राख्ने अधिकारीहरूका अनुसार प्रधानमन्त्री ताकाचीले मोदीलाई आफूले जापानका स्वर्गीय प्रधानमन्त्री शिन्जो आबेलाई आफ्ना ठूला दाइ सरह मान्ने गरेको र उनलाई आफ्नो आदर्शका रूपमा गहिरो सम्मान गर्ने गरेको बताएकी थिइन् ।

ताकाचीले शिन्जो आबेका मनमा पनि प्रधानमन्त्री मोदीप्रति विशेष स्नेह र उच्च सम्मान रहेको बताएकी थिइन् । आबेको त्यही भावना र सम्बन्धलाई निरन्तरता दिँदै उनले अब आफूले पनि मोदीलाई आफ्ना ठूला दाइका रूपमा हेर्ने इच्छा व्यक्त गरिन् ।

शिन्जो आबेले जोडेको भावनात्मक सम्बन्ध
प्रधानमन्त्री मोदी र स्वर्गीय जापानी नेता शिन्जो आबेबीच निकै घनिष्ठ व्यक्तिगत सम्बन्ध थियो । ८ जुलाई २०२२ मा जापानको नारा सहरमा एक आक्रमणकारीले आबेमाथि गोली प्रहार गरी हत्या गरेको थियो । नारा नै हालकी प्रधानमन्त्री ताकाचीको संसदीय निर्वाचन क्षेत्र पनि हो । जापानका सबैभन्दा लामो समयसम्म प्रधानमन्त्री बनेका आबेको कार्यकालमा भारत–जापान सम्बन्ध नयाँ उचाइमा पुगेको मानिन्छ ।

आबेसँगको गहिरो मित्रताका कारण प्रधानमन्त्री मोदी २७ सेप्टेम्बर २०२२ मा विशेष रूपमा टोकियो पुगेका थिए र आबेको राजकीय अन्त्येष्टिमा सहभागी भएका थिए । त्यहाँ उनले आबेकी पत्नी अकी आबेसँग भेटेर समवेदना व्यक्त गरेका थिए । त्यस क्रममा मोदी केहीबेर शिन्जो आबेको तस्वीरअगाडि मौन रूपमा उभिएका थिए, जसले धेरै जापानी नागरिकलाई भावुक बनाएको थियो । यस घटनाले मोदी र आबेबीचको मित्रता कति आत्मीय थियो भन्ने देखाएको थियो ।

‘सुन्दर सानी बहिनी’ भनेर सम्बोधन
शिन्जो आबेप्रति दुवै नेताको मनमा रहेको यही गहिरो सम्मान र आत्मीय सम्बन्धलाई आधार मान्दै प्रधानमन्त्री मोदीले ताकाचीलाई ‘सानो बहिनी’ भनेर सम्बोधन गरेका हुन् । प्रधानमन्त्री ताकाचीले पनि यो दाजु–बहिनीको सम्बन्धलाई खुलेर स्वीकार गर्दै आफूलाई ‘सुन्दर सानी बहिनी’ भनेर सम्बोधन गरेकोमा प्रधानमन्त्री मोदीप्रति विशेष धन्यवाद व्यक्त गरिन् । उनले दुवै नेताको सोच र दृष्टिकोण धेरै विषयमा मिल्ने उल्लेख गर्दै यो सम्बन्धले उनीहरूबीच बनेको पारस्परिक विश्वास र आत्मीयतालाई झल्काउने बताइन् ।