वाणगंगा नदीको बाढीमा फसेका ७ युवालाई सुरक्षाकर्मीको टोलीले सकुशल उद्धार गर्यो
असार २७, २०८३ शनिबार १७:४७:१०
कपिलवस्तु : बाणगंगा नगरपालिका-८ बालापुरस्थित बाणगंगा नदीको बीचमा फसेका ७ युवालाई सुरक्षाकर्मीहरूको संयुक्त टोलीले सकुशल उद्धार गरेको छ।
नेपाली सेना, सशस्त्र प्रहरी र नेपाल प्रहरीको संयुक्त उद्धार टोलीले उनीहरू सबैलाई सकुशल उद्धार गरेको हो। नदीको बाढीमा फसेका युवाहरू वाणगंगा नदीमा पौडी खेल्न गएका थिए। इलाका प्रहरी कार्यालय पिपराबाट प्रहरी निरीक्षक अर्जुन पौडेलको कमाण्डमा २० सुरक्षाकर्मीको टोली विपद् उद्धार सामग्रीसहित खटी गएको थियो।
वाणगंगा क्षेत्रमा वर्षा नभए पनि नदीको माथिल्लो तटीय क्षेत्र अर्घाखाँची जिल्लामा वर्षा भएका कारण नदीमा बाढी आएको थियो। उद्धार कार्यमा नेपाली सेना, सशस्त्र प्रहरी र नेपाल प्रहरीको संयुक्त सुरक्षाकर्मीको टोली परिचालन भएको प्रहरी नायब उपरीक्षक रिपेन्द्र कुमार सिंहले बताए। उद्धार क्षेत्रमा क्रेन समेत परिचालन गरिएको थियो।
प्रतिक्रिया दिनुहोस !
