अन्त्येष्टि कार्यक्रमस्थलमा इजरायलको आक्रमण : १४ प्यालेस्टिनीको मृत्यु

इजरायल : गाजा क्षेत्रमा भएका विभिन्न इजरायली आक्रमणमा कम्तीमा १४ जना प्यालेस्टिनीको मृत्यु भएको छ । तीमध्ये आधाभन्दा बढी मानिस अन्त्येष्टि जुलुसमा सहभागी भइरहेका बेला भएको ड्रोन आक्रमणमा मारिएका हुन् ।

हमाससँग भएको भनिएको ‘युद्धविराम’ सुरु भएको नौ महिनापछि पनि इजरायलले लगभग दैनिक रूपमा त्यसको उल्लंघन गरिरहेको आरोप लगाइएको छ । शुक्रबार मध्य गाजाको नुसेरात शरणार्थी शिविरस्थित अल–बालाता बजार क्षेत्रमा सर्वसाधारणको जमघटलाई लक्षित गरी भएको इजरायली आक्रमणमा ८ जनाको मृत्यु भएको गाजाको नागरिक सुरक्षा निकाय र एक अस्पतालले जनाएको छ ।

अल–अवदा अस्पतालका अनुसार आक्रमणमा कम्तीमा २० जना घाइते भएका छन् । प्रत्यक्षदर्शीका अनुसार, यसअघि सोही क्षेत्रमा भएको अर्को आक्रमणमा मारिएका एक प्यालेस्टिनीको अन्त्येष्टि गर्न अहमद यासिन मस्जिद बाहिर भेला भएका मानिसहरूलाई लक्षित गर्दै ड्रोन आक्रमण गरिएको थियो ।

गाजाबाट पत्रकार हानी महमुदले भने, ‘युद्धविरामको कुनै सम्मान भइरहेको छैन ।’ उनका अनुसार, अन्त्येष्टि जुलुसमा सहभागी मानिसहरू मस्जिदबाट बाहिर निस्कँदै गर्दा ड्रोनले जुलुसभित्रै रहेका मानिसहरूको समूहलाई निशाना बनाएको थियो । एएफपी समाचार संस्थाका अनुसार इजरायली सेनाले उक्त आक्रमण गरेको पुष्टि गरेको छ ।

इजरायली सेनाले मध्य गाजामा रहेको ‘आतंकवादी समूह’ लाई लक्षित गरी आक्रमण गरिएको दाबी गरेको छ । तर आक्रमणमा सर्वसाधारण पनि परेको दाबीबारे आफूहरू जानकार रहेको र घटनाको समीक्षा भइरहेको जनाएको छ । प्यालेस्टिनी समूह हमासले उक्त आक्रमणको निन्दा गर्दै यसलाई ‘घृणित अपराध’ भनेको छ । हमासले युद्धविराम सम्झौताको निरन्तर उल्लंघन गर्दै इजरायलले निर्दोष नागरिकको हत्या र त्रास फैलाइरहेको आरोप लगाएको छ ।

‘आकाश ड्रोनले भरिएको छ’
शुक्रबार बिहान उत्तरी गाजाको बेत लाहिया शहरमा अबु तमाम विद्यालय नजिक इजरायली ड्रोनबाट खसालिएको बममा परी ५२ वर्षीया महिलाको मृत्यु भएको प्यालेस्टिनी समाचार संस्था वाफाले जनाएको छ । मध्य गाजाको अज–जवायदामा प्यालेस्टिनीहरूको जमघटलाई लक्षित गरी गरिएको अर्को आक्रमणमा एक जनाको मृत्यु भएको र धेरै घाइते भएको बताइएको छ ।

नुसेरात शरणार्थी शिविरको पश्चिमी क्षेत्र अल–सवारहामा विस्थापित मानिसहरू बस्ने संरचनामा इजरायली आक्रमण हुँदा एक जनाको मृत्यु भएको छ । यसैगरी गाजा शहरमा इजरायली ड्रोनले एउटा अपार्टमेन्टलाई निशाना बनाउँदा एक प्यालेस्टिनीको मृत्यु भएको र बालबालिकासहित धेरै घाइते भएको जनाइएको छ । खान युनिसको दक्षिणपश्चिम क्षेत्रमा इजरायली गोली लागेर घाइते भएकी एक महिलाको पनि मृत्यु भएको छ ।

गत अक्टोबरमा भनिएको ‘युद्धविराम’ लागू भए पनि गाजामा इजरायली आक्रमण निरन्तर भइरहेको आरोप छ । सशस्त्र द्वन्द्व तथा घटना तथ्यांक समूहले बुधबार सार्वजनिक गरेको विवरणअनुसार मे महिनापछि गाजामा इजरायली आक्रमण बढेको छ । समूहका अनुसार गत महिना मात्रै ४० भन्दा बढी आक्रमण भएका छन्, जुन युद्धविराम सुरु भएयताकै सबैभन्दा धेरै मासिक संख्या हो ।

पत्रकार हानी महमुदले भने, ‘गाजाको आकाश ड्रोनले भरिएको छ । चारैतिर ड्रोनको मेसिनको आवाज सुनिन्छ ।’ उनले गाजामा बाँकी रहेका पूर्वाधारहरू पनि निरन्तर ध्वस्त पारिँदै गएको बताए । इजरायली पत्रिका हारेत्ज ले शुक्रबार प्रकाशित रिपोर्टमा युद्धविराम सुरु भएयता इजरायलले २७४ जना बालबालिकाको हत्या गरेको दाबी गरेको छ । रिपोर्टले औसतमा दैनिक एक बालबालिका मारिएको उल्लेख गरेको छ ।