भारत : दिल्लीको जन्तर–मन्तरमा विगत २० दिनदेखि अनसनमा बसेका सामाजिक अभियन्ता सोनम वाङ्चुकलाई दिल्ली प्रहरीले नियन्त्रणमा लिएर अस्पताल लगेको छ । वाङ्चुकलाई प्रहरीले अचानक नियन्त्रणमा लिएर जाँदा मञ्चमा ककरोच जनता पार्टी (सीजेपी) का संस्थापक अभिजीत दीपके उपस्थित थिएनन् । यसलाई लिएर सामाजिक सञ्जालमा विभिन्न प्रश्न उठेपछि सीजेपीले स्पष्टीकरण दिएको छ ।
सीजेपीका अनुसार, उक्त समयमा दीपके प्रदर्शनस्थल नजिकै नुहाउन गएका थिए । प्रदर्शनकारीलाई नुहाउन वा शौचालय प्रयोग गर्न पनि नपाइने हो र भन्ने प्रश्न गर्दै पार्टीले आफूविरुद्ध भइरहेको दुष्प्रचारलाई निन्दनीय र खतरनाक भनेको छ । शनिबार जन्तर–मन्तरमा अचानक प्रहरीले वाङ्चुकलाई जबरजस्ती अस्पताल लगेपछि परिस्थिति बदलिएको छ ।
दिल्ली प्रहरीका अनुसार, २० दिनदेखि निराहार अनसनमा रहेका वाङ्चुकको स्वास्थ्य लगातार बिग्रँदै गएको र दिल्ली उच्च अदालतको आदेशअनुसार उनको स्वास्थ्य सुरक्षालाई ध्यानमा राख्दै सफदरजंग अस्पताल लगिएको हो । हाल उनी चिकित्सकको निगरानीमा छन् ।
अभिजीत दीपके कहाँ थिए ?
वाङ्चुकलाई प्रहरीले नियन्त्रणमा लिँदा दीपके कहाँ थिए भन्ने विषयमा सामाजिक सञ्जालमा उनी कुनै भवनमा सुतिरहेको आरोप लगाइएको थियो । यसबारे सीजेपीले प्रतिक्रिया दिँदै भनेको छ, ‘अभिजीत दीपके प्रदर्शनस्थल नजिकै नुहाउन गएका थिए । प्रदर्शनकारीले नुहाउन र शौचालय प्रयोग गर्न पनि नपाउने हो ? यस्तो घटिया दुष्प्रचार निन्दनीय र खतरनाक छ ।’
वाङ्चुक अस्पतालको आकस्मिक कक्षमा
जानकारीअनुसार, सफदरजंग अस्पतालको आकस्मिक (इमर्जेन्सी) कक्षमा भर्ना गरिएका वाङ्चुकको मेडिसिन विभागका चिकित्सकहरूले उपचार गरिरहेका छन् । अस्पतालका अनुसार उनी होशमा छन् र उनका सबै स्वास्थ्य सूचक (प्यारामिटर) स्थिर छन् । अस्पतालले छिट्टै स्वास्थ्य बुलेटिन सार्वजनिक गर्ने जनाएको छ ।
दीपकेले पनि सुरु गरे अनसन
प्रहरीले वाङ्चुकलाई लगेलगत्तै जन्तर–मन्तरस्थित आन्दोलनस्थलमा अभिजीत दीपकेले पनि अनिश्चितकालीन अनसन सुरु गरेका छन् । उनले आफूमाथि कुटपिट भएको आरोप लगाउँदै आन्दोलन जारी रहने बताएका छन् ।
२० जुलाईमा संसद मार्चको घोषणा
दीपकेले सबैलाई आफ्ना गाउँ–सहरमा शान्तिपूर्ण प्रदर्शन गर्न आग्रह गर्दै २० जुलाईमा प्रस्तावित संसद मार्च यथावत् हुने बताएका छन् । सीजेपीका नेता आशुतोष रांकाले पनि कसैको प्रतीक्षा नगरी आन्दोलनलाई अघि बढाउनु पर्ने बताएका छन् । सीजेपीले भनेको छ कि सोनम वाङ्चुकलाई प्रहरीले जबरजस्ती उठाएर लगेको हो ।
प्रतिक्रिया दिनुहोस !
